喺2021年,香港政府有意就假新聞嘅社會問題立法,規管傳媒工作,不過社會上有唔同嘅討論,親中陣營(親政府派)大多表示支持,認為咁樣可以阻止市民批評政府,唔再傷害社會,但有人(泛民主派支持者)就覺得香港政府有意用嚟打壓言論自由[1][2],亦有人覺得一件新聞事件可以用唔同角度報道,唔係政府講乜就寫乜[3],就算有假新聞,都唔一定要用法律規管控制。甚至有人提出證據,支持就假新聞問題立法嘅親政府派,先至係假新聞嘅始作俑者[4]。
去到2022年2月中,署理民政事務局長陳積志喺立法會會議上表示希望喺上半年完成有關研究工作[5]。
香港記者協會表明反對立法規管傳媒工作,認為喺2000年四個新聞專業團體,包括記協、新聞行政人員協會早喺21年前已經共同訂立《新聞從業員專業操守守則》,列明做新聞要求真、客觀,確保無誤導,四哥會亦有機制處理投訴[3]。
記協主席楊健興喺2021年接受紐約時報訪問嘅時候,話政府嘅立法計劃同埋主要官員經常性將「假新聞」放喺口邊,係試圖逃避不滿公眾嘅問責,特別係反修例運動入面,係為咗逃避公眾嘅批評[1]。
《眾新聞》總編輯李月華批評,假新聞條例細節唔清晰,而且可能包山包海,可能會比北京未經諮詢或部分香港市民同意而強行訂立,引起非建制派負評四起嘅《中華人民共和國香港特別行政區維護國家安全法》造成更大嘅傷害[2]。
香港中文大學新聞與傳播學院教授蘇鑰機指,獨裁國家先會用法律、逮捕去控制假新聞,而更自由嘅國家通常以教育為手段處理[2]。
好多親政府派嘅人(例如:田北辰[5])都支持就假新聞問題立法。行政會議成員湯家驊強調假新聞法係香港處理呢個問題嘅唯一出路[2]。
2023年6月尾,特首李家超接受《星島日報》訪問,表明唔會訂立《假新聞法》,佢話如果業界自我規律同行業操守令問題可控,就唔洗以立法手段處理假新聞問題,「唔會因為傷風咳,就當係癌症處理」,意味住香港假新聞法爭議告一段落。[6]