飛蛾
飛蛾(粵讀:fei1 ngo4),學名叫異角亞目(Heterocera),係鱗翅目嘅其中一個亞目,係蝴蝶嘅近親[1][2]。同第啲昆蟲一樣,飛蛾屬節肢動物-佢哋身體嘅表面有一節節嘅外骨骼(節肢動物嘅特徵),成蟲嘅身體分做頭、胸同腹三橛(昆蟲嘅特徵);飛蛾冚唪唥都曉飛,兩對翼就生咗喺個胸嘅背脊度;同蝴蝶嘅翼一樣,飛蛾嘅翼上面有鱗,不過飛蛾色水通常冇蝴蝶嘅咁鮮艷。另一樣同蝴蝶唔同嘅係,多數物種嘅飛蛾都係興夜晚出沒嘅,不過都有部份物種係興朝頭早出沒嘅[3]。
![]() | ||||||||||
---|---|---|---|---|---|---|---|---|---|---|
![]() | ||||||||||
物種分類 | ||||||||||
|
飛蛾係完全變態嘅昆蟲,多數飛蛾物種嘅生命歷程如下:一隻大咗肚嘅飛蛾乸會喺啲植物左近(啲葉上面或者根隔離)產卵;跟手啲幼蟲(毛蟲)孵咗出嚟之後就會靠食樖植物嘅某啲部份嚟維生,啲幼蟲生到咁上下就會結蛹;當變態嘅過程完咗,個蛹會爆開,隻成蟲(隻飛蛾)就會由個蛹嗰度捐出嚟;等兩對翼乾咗,隻蛾就會要喺好短嘅時間(好多時得嗰一兩日)之內飛去搵伴侶;交配完咗之後,啲飛蛾乸就會產卵;無論公定乸,飛蛾通常喺交配嘅過程完咗之後冇幾耐就會死。佢哋嘅下一代跟住就會由頭噉經歷過呢個由生到死嘅過程[4][5]。
飛蛾內部有豐富嘅多樣性:直至 2000 年代為止,已知嘅飛蛾物種大約有成 160,000 種咁多,可以分做超過 100 個科[6];相比之下,例如蝴蝶就得嗰 18,000 個物種左右-飛蛾物種嘅數量多過蝴蝶物種好多[7]。
同蝴蝶嘅比較
- 外形比較:飛蛾係蝴蝶嘅近親,兩者喺外形上有好多共通點-兩種生物都係昆蟲,身體表面有一節節嘅外骨骼,成蟲嘅身體分做頭、胸同腹三橛;同蝴蝶一樣,飛蛾有複眼同觸鬚,全部物種都有翼識飛;除此之外,飛蛾同蝴蝶都屬鱗翅目[歐 1],喺外形上最大嘅特徵係有兩對(四隻)翼,啲翼上面佈滿咗鱗,啲鱗色水可以好鮮艷多變;不過飛蛾個樣又同蝴蝶有明顯差異[註 1]-
- 飛蛾興夜晚出沒而蝴蝶興朝頭早出沒,飛蛾通常色水暗淡啲(不過都有唔少例外);
- 飛蛾唔飛嗰陣興攤開對翼,而蝴蝶唔飛嗰陣就比較多會將對翼合埋一齊;
- 飛蛾同蝴蝶嘅觸鬚形狀唔同-多數蝴蝶物種嘅觸鬚都係好幼好細條,而且個尾段有個細細地嘅波嘅,而飛蛾嘅觸鬚就係呈羽毛噉形,兼且個尾度冇波嘅。
|
- 進化史:喺地球史上,飛蛾出現嘅時間早過蝴蝶,化石研究搵到早喺 1,900,000 年前飛蛾就存在;仲有,蝴蝶係單系群[歐 2]嘅生物-即係話所有現存嘅蝴蝶喺進化史上都有一個共同嘅祖先;相比之下,飛蛾唔係單系群-其中一個可能嘅情況係,喺飛蛾嘅進化史上某啲點度,有幾個生物物種分別噉進化成飛蛾,而呢啲分別各自進化出嚟嘅族群甚至仲可能有雜交過;生物學家冇辦法將所有現存嘅飛蛾追溯到去一個共同祖先度[9]。
![](http://upload.wikimedia.org/wikipedia/commons/thumb/9/99/Assorted_Moths_%28Lepidoptera%29_in_the_University_of_Texas_Insect_Collection_%2822281153644%29_%28cropped%29.jpg/450px-Assorted_Moths_%28Lepidoptera%29_in_the_University_of_Texas_Insect_Collection_%2822281153644%29_%28cropped%29.jpg)
生物學研究
食嘢
飛蛾嘅幼蟲(毛蟲)多數係食齋嘅,具體食啲乜就視物種而定,好多飛蛾物種嘅毛蟲會食植物嘅葉同根呀噉,亦都有啲飛蛾嘅毛蟲會食人類嘅衫或者農作物,因而俾人視為害蟲。
成年嘅飛蛾有好多都係唔會食嘢嘅:呢啲物種嘅毛蟲會猛咁勁食嘢儲起養份,生到咁上下(途中會脫皮增齡)就會結蛹,蛹過咗一段時間之後就會有隻成蟲捐出嚟;隻成蟲好多時甚至乎連口器都冇-佢哋由個蛹捐出嚟之後要做嘅,就係有咁快得咁快去搵返個伴侶交配傳宗接代,生完蛋之後冇幾耐,就算佢哋冇俾獵食者食落肚,最後都會監生餓死[註 2],例如合桃仁飛蛾[歐 4](北美洲一種出名大隻嘅飛蛾)嘅口器係痕跡器官,冇能力食嘢[11]。
亦有一部份嘅飛蛾物種係啲成蟲會食嘢嘅,多數係靠飲花蜜或者類似嘅液體維生[12],例子可以睇吓骷髏天蛾[歐 5]等多種屬天蛾科嘅飛蛾物種。
天敵
同多數嘅昆蟲一樣,飛蛾喺食物鏈入面嘅位置並唔高。夜晚出沒嘅動物好多時都會食飛蛾,好似係好多個物種嘅蝙蝠同埋貓頭鷹噉;除此之外,飛蛾嘅獵食者仲有好多物種嘅蜘蛛、蜻蜓同螳螂等嘅大隻食肉昆蟲、蜥蜴、貓、狗、嚙齒目甚至係某啲物種嘅熊;而喺毛蟲階段嗰陣,飛蛾幼蟲仲有機會會受到寄生蜂攻擊。
因為佢哋有咁多天敵,飛蛾進化出唔少應對獵食者嘅對策:例如有實驗顯示,當飛蛾聽到蝙蝠發出嘅超聲波嗰陣,曉反射性噉降低自己嘅飛行高度,似乎係準備迴避天敵蝙蝠嘅攻擊;而喺燈蛾[歐 6]呢個亞科嘅飛蛾當中,有啲物種甚至仲識得自己射啲聲波出嚟打亂蝙蝠嘅超聲波定位系統,等啲蝙蝠難啲探測到佢哋嘅位置[13]。
撲光行為
飛蛾另一樣出名嘅特徵係,佢哋好興喺人造嘅光源(例如係火同電燈膽呀噉)四圍飛嚟飛去,甚至會撲埋去個光源度,就算個光源係火都係一樣[14]。飛蛾嘅呢種行為出名到令粵文入面有咗句成語叫做燈蛾撲火(dang1 ngo4 pok3 fo2)-比喻啲人「自取滅亡」[15]。
對於「飛蛾點解會有啲噉嘅行為」,目前科學界仲未有一個清楚嘅答案。其中一個假說主張,飛蛾撲光嘅行為同飛蛾體內嘅導航系統有啦掕:
- 頭先提咗,飛蛾多數係喺夜晚黑出沒嘅,呢點令到佢哋進化出嚟嘅體內導航系統係以「攞一個好勁嘅光源,再同個光源維持固定角度」嚟做原則嘅-噉講即係話,飛蛾飛嗰陣嘅準則係要攞個勁嘅光源-佢哋偏向夜行,所以個光源正常嚟講會係月亮,再要自己飛行軌跡同個光源維持住某個固定嘅角度。如果佢攞嗰個光源係月亮嘅話,因為月球離地球表面好遠,所以一隻飛蛾就算飛過成個樹林咁遠嘅距離,佢自己條飛行軌跡同月亮之間嘅角度都冇咩點變,所以隻飛蛾會繼續飛直線[16]。
- 呢個導航系統一到咗現代就出事。人類文明嘅發展令飛蛾周圍嘅環境多咗好多勁嘅光源[17];飛蛾好多時會攞咗火或者電燈呢啲人造光源嚟做導航(當咗呢啲人造光源係月亮),而當一隻飛蛾嘗試同一個離佢好近嘅人造光源-例如係一盞燈-「維持固定角度」嗰陣,佢就會開始圍住盞燈打轉;而且因為飛蛾慣咗用月亮做導航,對於佢哋嚟講,「飛高啲」等如「飛近啲個導航光源」-一隻攞咗盞燈做導航嘅飛蛾嘗試「提升高度」嗰陣,佢就會變成飛埋去盞燈度,最後仲可能因而撞落盞燈度[16]。人造光源嘅呢種影響甚至仲對某啲飛蛾物種造成威脅,令佢哋數量下降[18]。
同人類嘅關係
![](http://upload.wikimedia.org/wikipedia/commons/thumb/b/b8/Lymantria_dispar_MHNT.CUT.2012.0.357_Col_de_Cricheto_Bastelica_male_Dos.jpg/300px-Lymantria_dispar_MHNT.CUT.2012.0.357_Col_de_Cricheto_Bastelica_male_Dos.jpg)
為患
有好多個物種嘅飛蛾啲幼蟲會食各種嘅植物-包括咗唔少農作物,所以飛蛾喺世界好多個地方都俾人當做害蟲。當中比較出名嘅有以下呢啲[19]:
- 羅姆飛蛾[歐 7]出咗名係一種喺美國東北嘅入侵性物種,佢哋嗰啲幼蟲會食好多種植物嘅葉,進而對嗰頭啲樹林造成好大嘅破壞;國際自然保護聯盟甚至仲喺廿一世紀初將羅姆飛蛾列做世上頭 100 大入侵性物種之一。
- 喺熱帶同亞熱帶地區,小菜蛾[歐 8]成日破壞十字花科嘅農作物-呢個科包括咗西蘭花同椰菜等嘅蔬菜;小菜蛾乸會喺呢啲農作物上面生蛋,啲毛蟲生咗出嚟就會食同破壞呢啲農作物[20];
- 喺撒哈拉沙漠以南嘅非洲都有飛蛾喺度破壞粟米同甘蔗[21]。
... 呀噉。
蠶蟲
又有一啲物種嘅飛蛾有經濟價值。當中最出名嘅要數蠶蟲(粵讀:caam4 cung2)。
蠶蟲係一個飛蛾物種,學名係 Bombyx mori,早喺公元前 3,000 年嗰陣嘅古華夏經已俾人馴養咗[22];蠶蟲毛蟲主要食白桑嘅葉維生,佢哋同第啲飛蛾一樣行完全變態,啲毛蟲生到咁上下就會結蛹;最重要嘅係,蠶蟲結蛹嗰陣會吐啲絲出嚟,而呢啲絲跟住可以攞嚟整絲綢-絲綢係種好緊要嘅經濟產物。因為噉,有唔少人都會養蠶蟲做絲綢生產嘅一環,形成咗養蠶呢個行業。而直至 2000 年代為止,養蠶業每年生產成 1 億 3,000 萬 kg 咁多絲,咁多絲大約值成 2 億 5,000 萬美金[23][24]。
文化影響
飛蛾通常都係夜晚黑出沒,色水暗淡唔多靚(但查實有唔少例外),而且又有多個物種係害蟲,搞到佢哋喺人類文化入面嘅形象好多時都唔多正面。
- 靈異相關:
- 西洋:西人傳統上都好興將飛蛾同啲恐怖靈異嘢聯想埋一齊,用飛蛾做呢啲嘢嘅象徵;例如係 2012 年出嘅美國恐怖片《陰魂轉讓》[歐 9]噉,呢套戲個故仔講到邪靈,用咗飛蛾嘅存在嚟代表邪靈作祟,而且套戲啲海報仲有描繪其中一個角色「唔受控制噉嘔啲飛蛾出嚟」嘅情境令觀眾不安;事實係「用飛蛾象徵恐怖靈異嘢」呢種做法喺西洋嘅創作品入面成日都見到,常見到仲俾電視橋段網(一個專講橋段嘅維基型網站)收錄咗做一條橋段[註 3]。
- 唐人:唐人-包括粵人-傳統上都有類似嘅文化,相信飛蛾同鬼魂有某啲瓜葛;唐人多數都有傳統,相信死咗冇幾耐嘅人嘅靈魂會喺頭七嗰陣化身做昆蟲-尤其係飛蛾-飛返嚟見屋企人,又有啲傳說講飛蛾係帶亡魂上路嘅昆蟲;因為噉,喺傳統習俗裏面,如果喺先人死咗嘅尾七嗰時有飛蛾喺屋企出現,絕對唔可以殺或者捉隻飛蛾,認為捉同殺飛蛾會搞到先人返唔到落陰間[25]。除咗噉,亦都有傳說講飛蛾(同近親蝴蝶)會喺靈堂附近徘徊[25]。
- 做嘢食:有啲人會攞飛蛾嘅幼蟲或者蛹嚟食,例如喺剛果民主共和國,啲人會用超過 30 個物種嘅飛蛾幼蟲嚟整嘢食,仲有埋跨國市場-剛果嘅人唔止會將啲飛蛾幼蟲喺本地嘅市場度賣,仲會成噸成噸噉將呢啲毛蟲運去第啲非洲國家度賣[26];除此之外,東北三省同日韓等地都有傳統會炸蠶蟲嘅蛹嚟食[27][28]。
... 等等。
圖集
睇埋
註釋
歐詞
攷
拎
- 香港蛾蝶網
- 巨型大燕蛾飛入慈雲山民居 專家稱本港少見:可用呢樣嘢驅走,HK 01
- 七種壯觀嘅飛蛾慢鏡睇! (英文),慢鏡拍幾種飛蛾起飛嗰陣時嘅樣。
- 恐怖飛蛾母題 (英文),電視橋段網講到創作品傾向將飛蛾描述成恐怖嘢。