鄭若驊
鄭若驊，GBM[1]，GBS[2]，SC，JP[3]（英文：Teresa Cheng Yeuk-wah，1958年11月11號—），外號「女公職王」、「僭建驊」、「司底驊」，2018年1月6號至2022年6月30號出任香港政府律政司司長。2000年獲委任為資深大律師，佢亦同時係擁有土木工程師資格嘅特許工程師、特許仲裁員同專業調解員[4][5]。
| 鄭若驊 | |
|---|---|
.jpg) | |
| 出生日 | 1958年11月11號  （65歲） |
| 出生地 | 英屬香港 |
| 國籍 | 中華人民共和國 |
| 母校 | |
| 職業 | 律政司司長、資深大律師、政治人物 |
| 僱主 | 前任行政長官林鄭月娥 |
| 配偶 | 第一任老公：李匡華 第二任老公：潘樂陶 |
[改維基數據] | |
簡歷
鄭若驊加入政府之前係私人執業資深大律師，擁有特許工程師、特許仲裁員同專業調解員資格，經常喺複雜嘅國際商事同國際投資糾紛中獲委任為代理人或仲裁員。
佢亦係亞洲國際法律研究院創始成員同前任主席、國際商事仲裁會前任副主席、國際商會國際仲裁院前任副主席同香港國際仲裁中心前任主席。喺2008年經全球選舉成為第一位出任特許仲裁學會主席嘅亞洲女性，2011年至2017年擔任香港高等法院原訟庭暫委／特委法官。而家係世界銀行國際投資爭端解決中心仲裁員，並曾經出任世界銀行制裁委員會成員。
佢係倫敦大學英皇學院院士同清華大學法學院國際仲裁與爭端解決前任專案主任[6]。
2018年初，鄭若驊被傳媒揭發佢同老公潘樂陶喺屯門大欖嘅海詩別墅4號有多處懷疑違規僭建，從此被謔稱為「僭建驊」。
2019年11月14號（倫敦時間），鄭若驊喺訪問英國期間，畀十幾個香港修例風波嘅示威者包圍，結果佢就喺街頭仆親，兼夾甩骹。
2020年8月7號，美國財政部宣佈制裁十一位破壞香港自治嘅官員，其中就有鄭若驊[7]。
由於佢喺律政司司長任內，醜聞多多、爭議不絕，兼且長期民望低殘，因而有個花名叫「司底驊」。
屋企
鄭若驊阿爸叫鄭景瑜，阿媽叫梁麗萍[8]。早年佢嘅私生活好少人知，甚至被人話係單身。直到2018年初被揭發間屋違規僭建，先知原來佢有個老公。到2019年佢無申報，以私人嘅身份處理仲裁案時，先知原來佢仲有個仔。
佢嘅第一任老公係土木工程師李匡華，響1987年9月19號結婚，有個仔，個仔響2011年6月到8月期間曾經喺富而德律師行嘅巴黎辦事處實習[9]。
佢嘅第二任老公就係佢嘅「鄰居」、香港工程師學會前會長潘樂陶（Otto），兩人響2016年12月29號結婚，證婚人分別係前律政司司長、基本法委員會副主任梁愛詩同埋運房局局長陳帆[10]。