維吾爾族
維吾爾族（粵拼：wai4 ng4 ji5 zuk6；中國標準羅馬字：Uygur，字母代碼：UG，數字代碼：05[1]）係中亞嘅其中一個大民族。根據中國典籍，維吾爾族隋朝時叫回紇或回鶻，受突厥統治。現時人口約莫有1300萬人，主要聚居喺中華人民共和國新疆維吾爾族自治區同哈薩克，亦有唔少喺吉爾吉斯、烏茲別克等地。維吾爾族人用嘅語文叫維吾爾文，中國大陸生活嘅維吾爾族好多都識講普通話。
睇埋
中國維吾爾族人士人權問題
2014年開始，中共總書記習近平下令搞新疆再教育營，外界批評係集中營同搞種族清洗[2][3]。喺中國嘅維吾爾族人，被強迫勞役同監控，成為咗全球其中一個被關注嘅人權問題。美國國會眾議院喺2020年11月通過咗《防止強迫維吾爾勞動法》，希望可以改變呢個情況[4]。另外，喺2020年11月，天主教教宗方濟各喺自己同傳記作家合作嘅新書《讓我們夢想》入面，首度替維吾爾族人發聲，使用「被壓迫」、「可憐」等詞來形容維吾爾族，批評中共政府[5][6]。另外，喺2020年12月，美國《華盛頓郵報》報道，華為有份參與有關監視維吾爾族人嘅臉部辨識系統，並且可能會向中國公安轉交資料。事件引發法國球星基沙文決定同華為終止合作關係[7]。
而去到2021年10月，美國總統拜登一次演說入面，將北京政府對維吾爾族進行嘅種族滅絕行為，定義為大屠殺，並且將呢啲行為同納粹相提並論[8][9]。
