納粹德軍

喺1933年，希特拉上臺，成立咗納粹德國。佢其中最主要嘅政策之一，就係將個國家再軍事化，之後亦都有入侵過附近嘅國家，特登違反哂《凡爾賽條約》嘅規限^[7]。隨住國家軍事復興，軍事嘅工業亦都佔咗經濟越嚟越大嘅比重^[8]。

到二次大戰開始之後，佢最出名嘅戰略就係「閃電戰」（德文：Blitzkrieg），能夠極速咁用軍事威力嚟打敗敵人。經過呢個方法，納粹德國成功只係用個幾月嘅時間，就完全打贏咗法國戰役。到1941年，佢亦都用住同一個方法嚟進攻蘇聯，好快就打入到國家嘅中心地帶。佢同時亦都喺北非地區用呢個戰略嚟打贏。對歷史學家嚟講，呢啲所有嘅入侵決定，都係非常之膽生毛嘅決定^[9]。

不過，靠住呢種戰略嘅問題，就係托唔長。所以，到打入蘇聯冇耐之後，已經開始弱料咗，跟住喺1941年喺莫斯科第一次打輸仗。自此之後，納粹德國嘅軍隊權力一路跌，到1942年尾，已經再冇打仗嘅主動權，見哂呢種策略嘅弱點^[10]。到最終1945年德國投降，同盟國解散咗納粹德軍，軍隊正式玩完。

納粹德軍一直都同納粹黨嘅黨衛隊親密合作，其中包括埋佢哋犯過嘅戰爭罪^[11]。佢哋大部分都係喺蘇聯、波蘭、南斯拉夫、希臘、同意大利度犯，為咗繼續猶太人大屠殺同埋打壓游擊隊。

喺二次大戰期間，總共有1,800萬人喺納粹德軍服過役^[2][12][13]。到德國投降嗰陣，其中已經有1,130萬人一係死咗，一係就做咗戰俘^[14]。雖然證據證明到納粹德軍有好多人都有份參與過戰爭罪，不過只係最高層嘅人受到刑罰^[15][16]。根據歷史學家 Ian Kershaw，佢估計喺有份入侵蘇聯嗰300萬人之中，大部分都參與過戰爭罪^[17]。