相逢何必曾相識 (歌)

《相逢何必曾相識》由蔣志光作曲、填詞、王利名編曲、蔣志光同韋綺珊合唱，分別收錄喺兩人嘅專輯《相逢．走》同《革命》，另有同名國語版收錄喺蔣志光國語專輯《放心》。

填詞人用兩段相近嘅男女獨白，講出雙方對愛情嘅無奈^[1]，同時嵌入唐代詩人白居易長篇樂府《琵琶行》入面嘅「同是天涯淪落人，相逢何必曾相識」。

呢隻歌攞到幾個樂壇獎項，包括1990年第8屆十大勁歌金曲獎、第13屆十大中文金曲同埋喺1990年度叱咤樂壇流行榜頒獎典禮攞到「叱咤樂壇我最喜愛的歌曲大獎」。不過蔣志光形容隻歌係刻意商業計算嘅產物，佢唔滿意，得獎嗰陣覺得好空虛^[2]。