温庭筠

温庭筠係太原府祁人（而家山西省祁縣），佢係温彥博嘅後人，温彥博係唐太宗呢朝嘅宰相。

佢精通音律，自細就識琴、笛^{[註 2]}，能根據音樂填詞，天資穎敏，有寫得出好文章嘅文才^[3]。因爲佢嘅樣生得醜，所以畀人嗌做温鍾馗（wan1 zung1 kwai4），但佢有文才，考律賦時，要八韻成一篇，佢叉起手一吟就有一韻，八叉八韻就完成八韻詩，所以時人稱佢做温八叉（wan1 baat3 caa1）、温八吟（wan1 baat3 jam4）^[4]。

雖則有咁高才華，次次考進士都落榜，噉係在於佢嘅輕率行爲好多。有關温庭筠性格嘅軼事傳得幾多，大體上以佢浪漫嘅性格同品行放蕩爲主。温庭筠初初到長安時，幾多人尊重佢出衆嘅才華，佢亦自信自身嘅才華，結果佢出入啲花街柳巷，同啲公卿子弟飲酒度日，毫無念慮噉沉迷酒色^{[註 3]}。有次醉咗犯咗夜禁，同啲警官衝突，以致畀人打甩牙，將佢唱衰成個京師，落得好壞嘅名聲。加之佢又得失權貴，好唔畀面噉批判啲當權者，於是好快乞人憎。喺考場佢又恃住自身嘅才華，多番爲鄰席嘅人作詩，幫佢哋作弊，以致畀人稱呼做「救數人」。呢啲不正行爲令佢喺科舉及第唔出來^{[註 4]}。

甚至於丞相呢種當權者都夠膽放肆。佢曾經喺宰相令狐綯（中文：令狐綯）（ling4 wu4 tou4；令狐楚嘅仔）屋企度寄食，但因爲佢譏諷宰相無學問，又整蠱令狐綯^{[註 5]}，結果攀咗出來，亦因此得罪貴人而備受打壓^[4]。大中九年（855年），佢最後一次考進士，因爲驚佢又幫人作弊，而特召佢喺簾前受試，因此佢大鬧科場，喺遞年流放去隨縣（湖北）做縣尉^{[4][3][註 6]}。

大中十一年（857年），襄陽（湖北）刺史徐商賞識佢，招佢做巡官，於是入咗佢幕下，咸通二年（861年）徐商調離襄陽，佢亦就辭職去江東地方放浪，漂泊過世^{[註 7]}；喺淮南時，雖然令狐綯出鎮淮南，但因爲以前打壓過佢，所以唔去探佢^[4]。咸通四年（863年）温庭筠因爲窮而喺揚子院乞食，之後發生飲醉犯夜嘅事件，當時令狐綯冇幫温庭筠講說話，亦就冇罰到差人^[4]。因爲惡名傳到京師，佢親自去京城致書畀啲公卿，爲自己雪冤，之後留喺京城長安^[4]。

唐懿宗年間，咸通六年（865年），温庭筠任命爲國子助敎，來年舉任主試，掌管國子監試^[3][4]。因爲喺科場屢受壓制，所以佢主持考試與衆不同，佢提示啲人聽，佢會嚴格按照文章基準來判斷人，杜絕因人取士嘅歪風，喺當時傳爲美談，但亦因此招致權勢貴族嘅不滿^[3]。佢爲咗表明自己完全以文判等，將文章公之於衆，包括批判施政、暴露腐敗者嘅詩文，因爲噉惹來咗宰相楊收等人嘅憤怒，結果佢貶官爲方城尉^[4]。之後嘅生平不可攷，有講法話呢陣時佢人到高齡，咸通七年（866年）喺憂鬱中離世^[4]。而據新舊《唐書》，話徐商原本仲喺京師保佢，無奈徐商調任，所以佢唯有貶官，《唐才子傳》更加話佢最後流落江湖直到死。

温庭筠嘅詩同詞都好，喺詩方面同李商隱一樣有名聲，喺詞方面同韋莊齊名。佢嘅詩詞善於挖掘對象，有色彩美同音律美。佢嘅詩包含個人嘅遭遇、對時政嘅諗法、喺行旅中所感到嘅感慨等，佢嘅詞有好多作品係寫女人嘅閨情，寫得纖細又精巧。

舊時，啲人睇李商隱同温庭筠係同一派嘅詩家，嗌做「温李」。不過，據近來各家文學研究，認爲噉講唔夠正確，因爲佢兩個嘅藝術風格好唔同。論詩歌成就，温庭筠遠唔及李商隱，因爲佢嘅詩有啲「輕浮、淺薄、情感真誠少」；不過講佢嘅詞就幾有特色。

温庭筠係晚唐嘅詩人同詞人，特別係佢嘅詞喺中國文學史度佔有重要位置。歷代評論家都評價佢做「花間派鼻祖」，噉係因爲佢對呢個詞派嘅風格、詞格形成扮演緊要角色，因爲噉《花間集》收錄得最多嘅係温庭筠嘅詞。詞本來生發喺民間，到温庭筠手度鍛鍊過，先引起文士嘅關心，以後五代同宋代嘅詞人先會競相創作，令詞成爲中國文學嘅主要文體之一。喺温庭筠以前嗰啲詩人係借民間詞形式來作詞，而温庭筠有音樂嘅才能，能夠據樂曲定詞調，再注入文學嘅才能，創作出多過前人嘅詞作，所謂「能逐弦吹之音，爲側豔之詞」，佢啲詞有浪漫嘅、唯美嘅感性表現，色彩濃淡，造語華靡，造成佢嘅風格「香軟，脂香粉味」。呢種風格影響到後世詞人，形成「花間派」，而佢尊榮爲第一人^{[5][註 8]}。温庭筠詞嘅主題大略限定喺女性嘅姿態、愛情、思戀、離別同願望，諸如相思之愁等。題材係偏狹，但妥當嘅睇法係既有温庭筠個人嘅個性趨向，亦有詞喺發展初期嘅詞格起因。

據《新唐書·藝文志》，温庭筠嘅文集有^[4]：

• 《漢南真稿》十卷
• 《握蘭集》三卷
• 《金荃集》十卷
• 《詩集》五卷

另外，佢又寫咗類書《學海》十卷、小說《採茶錄》一卷、《乾巽子》三卷。但佢啲作品幾乎都失傳曬，詩詞僅見於《花間集》、《全唐詩》、《全唐文》，《乾巽子》部分文句保存喺《太平廣記》嘅引錄^[4]。

到現代爲止，佢嘅詩現存310幾首，有《温飛卿詩集》九卷，由清人顧嗣立校注；佢嘅詞現存70首，見於王國維輯錄嘅《金荃詞》同林大春彙集嘅《唐五代詞》^[4]。

• 劉昫. 〈卷二百：文苑傳 — 温庭筠傳〉. 《《舊唐書》》.
• 歐陽脩、宋祁. 〈卷九十一 列傳第十六：温皇甫二李姜崔傳 — 温庭筠傳〉. 《《新唐書》》.，另可查中國哲學書電子化計劃嘅內容。
• 辛文房. 〈卷八 — 温庭筠傳〉. 《《唐才子傳》》.
• 孫光憲. 〈卷十〉. 《《北夢瑣言》》. 薛侍郎昭緯氣貌昏濁，杜紫微唇厚，溫庭筠號溫鍾馗，不稱才名也。
• 孫光憲. 〈卷四 — 温庭筠記事〉. 《《北夢瑣言》》.
• 余冠英、錢鍾書、范寧. 〈第二冊〉. 《《中國文學史》》. 中國社會科學院文學研究所.
• Nguyễn Hiến Lê（阮獻黎） (1997年). 《《Đại cương văn học sử Trung Quốc》（漢喃：大綱文學史中國；中譯：中國文學史大綱）》 (越南文). 少兒出版社（家出版𥘷；Nhà xuất bản Trẻ）. {{cite book}}: templatestyles stripmarker in |publisher= at position 7 (help); templatestyles stripmarker in |title= at position 95 (help)
• Trần Lê Bảo（陳黎保） (2004年). 〈新版詞條《温庭筠》〉. 《《Từ điển văn học》（漢喃：辭典文學；中譯：文學辭典）》 (越南文). 世界出版社（家出版世界；Nhà xuất bản Thế giới）. {{cite book}}: templatestyles stripmarker in |publisher= at position 7 (help); templatestyles stripmarker in |title= at position 79 (help)
• 袁行霈、羅宗强. 〈第二卷〉. 《《中國文學史》》. 高等教育出版社.
• 前野直彬（註解） (2000年). 《《唐詩選》下》 (日文). 岩波書店〈岩波文庫〉.
• 易君左 (1973年). 《《中國文學史》》. 華聯出版社.