李鄭屋漢墓博物館喺香港九龍深水埗,係香港歷史博物館五間分館之一,由康樂及文化事務署管理,當中嘅建築屬於香港法定古蹟。
1955年8月,香港政府為咗應付市民對公共房屋嘅需求,計劃響李鄭屋村起徙置大廈。當建築工人喺8月9號進行夷平山坡時,無意發現咗一個東漢墓穴。香港大學中文系系主任林仰山教授(Frederick Sequier Drake,1892-1974)於是帶學生前往研究發掘。據當年嘅老街坊回憶,響漢墓正式出土前,曾經有建築工人用外衣包住古物運離現場(睇1955年8月11號《星島日報》)。參考咗林仰山等考古學家評估後,市政局加建咗鋼筋水泥硬殼,以保護漢墓免受風雨侵蝕。漢墓響1957年由市政局接管及開放畀公眾參觀,墓裏面嘅出土文物都陳列響漢墓旁嘅展覽館內。1988年12月,李鄭屋漢墓被列為香港法定古蹟。
由2005年1月起,為紀念漢墓出土50週年,康樂及文化事務署進行一系列嘅復修工程,包括響墓室頂部加建一個用鐵氟龍物料製成嘅天幕,防止雨水造成嘅滲漏,減低被侵蝕嘅機會,耗資達100萬港元。墓室過去都冇採取過任何措施去保護佢,響1970年代香港嘅教科書所見,當時嘅墓室外圍亦只係一個生滿草嘅小山坡。直到1990年代後期,前市政局先至響外面加建保護設施,並響墓內裝設控制濕度嘅裝置。今日漢墓嘅墓室並唔對外開放,但係市民可以透過墓室門嘅玻璃,一睹呢個建於東漢時期嘅墓穴。
根據考古學家響發掘古墓時嘅周圍環境推斷,漢墓起嗰時佢係響海邊,但而家博物館所在嘅山腳處已離開海岸非常遠。即使扣除歷年因填海而增加嘅土地,亦可以察覺到從東漢到清末嘅1800年間,從珠江帶來嘅沙泥沉積落嚟嘅結果。
根據考古學家推斷,個墓喺東漢時期起。而喺漢墓出土咗67件文物,當中包括最少33件完整文物,例如屋舍模型同各種陶器同青銅器等。但係,漢墓裏頭冇發現任何骸骨。
漢墓嘅佈局為「十」字形,一共有四個墓室。墓室屬磚室墓,由長40厘米、闊20厘米同厚5厘米嘅磚塊砌成,而磚塊刻有10幾種花紋同文字「大吉番禺」,但室入口道響出土前已受到破壞。
至於個墓嘅主人,有人話係鹽官,亦有意見話係避亂嘅貴族。
漢墓而家已成為康樂及文化事務署嘅一間博物館。由於需要穩定漢墓裏面嘅溫度同濕度,墓室並唔對外開放,但參觀者可透過裝嵌響羨道門口嘅玻璃牆窺探墓室裏面,參觀者亦可以睇埋漢墓旁邊嘅展覽館,除咗展出從漢墓出土嘅陶器同青銅器之外,重設有「李鄭屋漢墓」同「華南漢文化」兩個展覽,介紹漢墓嘅地理環境、墓室結構同發現經過,以及漢朝時期嘅嶺南文化。
康樂及文化事務署 |
| ||||||
---|---|---|---|---|---|---|---|
其他政府部門 同公營機構 | 機場核心計劃展覽中心 · 展城館 · 香港歷史檔案館 · 香港懲教博物館 · 警隊博物館 · 衞生教育展覽及資料中心 · 青嶼幹線訪客中心及觀景台 · 入境處博物館 · 金管局資訊中心 · 機電工程署展覽館 · 香港賽馬會藥物資訊天地 · 香港房屋委員會展覽中心 · 獅子會自然教育中心 · 郵展廊 · 市區更新探知館 · 知識產權執法工作展覽館 · 室內空氣質素資訊中心 · 選舉資訊中心 · 廉政公署展覽廳 · 龍虎山環境教育中心 · M+ · 香港故宮文化博物館 | ||||||
教育同非牟利機構 | |||||||
私營同其他 | |||||||
已經停辦 | 大會堂博物院 · 徐氏藝術館 · 電訊堡 · 市政局大樓展覽中心 · 德華展覽廳 · 中華白海豚資源中心 · 香港2009東亞運動會展覽廊 · 牛頭角上邨文物展覽區 · 史前故事館 · 六四紀念館 · 大澳文化工作室 | ||||||
① - 香港歷史博物館分館、② - 香港文化博物館分館、③ - 香港藝術館分館、④ - 古物古蹟辦事處管理 |
22°20′17″N 114°09′36″E / 22.338094444444°N 114.16002222222°E / 22.338094444444; 114.16002222222