李明蔚(Sarena Li,1989年7月5號—2021年5月4號)係香港女歌手,曾經係組合小龍鳳嘅成員。2012年嗰陣,啱啱喺歌壇嶄露頭角嘅佢確診患上罕見嘅腺樣囊性癌,亦都係惡性度最高嘅癌之一[1],之後,李明蔚進行咗4次電療同卅幾次化療,聲帶同鼻腔都受到影響,但係佢仍然冇放棄歌唱事業,醫緊嘅同時亦都繼續唱歌,重喺9月13號發佈佢第一首歌《交換愛情》。2016年,李明蔚病情惡化,腫瘤再次擴大,癌細胞擴散去肺,開刀之後重因為神經發炎搞到面癱,右耳得返3成聽力[2],後嚟佢重要喺喉嚨開刀,令到佢以後都冇得唱歌,使咗五十幾萬都醫唔好個病[3]。
2021年5月4號下晝5點10分,李明蔚不敵癌症病逝,終年31歲,由一路喺身邊幫佢對抗病情嘅馬浚偉代表李明蔚屋企人喺Facebook宣布死訊。[4]