時態

時態有時會畀人界定為「一隻語言點樣表達一件事幾時發生」，但係呢個定義好含糊——絕大多數語言都實有方法表達一件事係發生喺過去定現在嘅，但係粵語表達呢種資訊嘅方法明顯同（例如）英文或者日文嘅有異。而 2024 年嘅不列顛百科全書就係噉嚟形容時態呢個概念嘅^[4]：

文法上講嘅時態（係）一種動詞範疇^{[e 1]}，會釐清「敘述緊嘅事件嘅時間」同「講嘢嗰刻嘅時間」之間嘅關係^{[註 2]}。喺好多語言入便，時間嘅概念唔係由動詞表達，而係由其他詞性嘅字詞（例如時間性質嘅狀語，甚至名詞）表達嘅。

一件事件發生嘅時間，可以想像成一個連續體，分做過去、現在同未來三個主要部份。

用英文做例，英文喺構詞上淨係得過去同非過去嘅對比：响廿一世紀初嘅英文入便，一隻動詞如果變過去式就要做詞形變化^{[e 2]}，通常係加 -ed（音通常係 /d/）喺尾；而雖然英文有方法表達「件事將來會發生」嘅資訊，但係佢哋並冇任何動詞係「如果係將來會發生，就要做詞形變化」嘅，只係隻動詞要掕 will 呢隻情態動詞喺前面^[5]；所以講動詞構詞嘅話，英文只有過去同非過去之別^[4]。例子可以睇睇以下呢啲動詞：

有啲語言處理時態嘅方法可能會同英文嘅好唔同。例如有啲語言有構詞嘅將來式，一隻動詞會有「將來式嘅樣」，唔淨只係加 will（或者類似嘅字詞）喺前面咁簡單。又例如有部份嘅語言會對時間作出更仔細嘅分區，例如可能過去式會分做「久遠過去式」同「冇耐前過去式」，規則係如果講緊嗰件事係超過三日前發生嘅就要用「久遠過去式」，而如果講緊嗰件事係過去三日內（例如之前嗰一日）發生嘅，就要用「冇耐前過去式」^[6]。

文法體^{[e 3]}係一個同時態好相似嘅概念，成日畀人攞嚟同時態一齊講。一般認為，文法體處理嘅係一件事件嘅「內部時間結構」，可以想像成「喺講嘢所指嘅嗰一刻時間，件事件發生到去邊一點」——件事件係啱啱開始、進行到半路會繼續進行定係已經完成^[7]。同時態一樣嘅係，文法體都係涉及到一件事件嘅時間特性，常作用喺動詞嗰度^[6]。用廿一世紀初嘅粵語做例，粵語起碼有進行式（件事件進行到半路）同埋完成式（件事件已經完結）呢兩種文法體：

進行式：「我著緊衫。」「我游緊水。」「我飲緊茶。」

完成式：「我著咗衫。」「我游咗水。」「我飲咗茶。」

—緊gan2係標示緊「進行中」噉嘅意思，而咗zo2就係標示緊「已經完成」噉嘅意思^{[註 3]}。喺嚴謹嘅語言學上，文法體同時態係兩個唔同嘅概念。用粵語嚟想像嘅話：

一般人被指成日都撈亂文法體同時態呢兩個概念，又或者係喺用詞上好求其，文法體同時態都一律當咗係時態概念嘅一部份^{[8][註 4]}。

語言學家要分析一隻語言點樣表達時間資訊，有陣時會出現爭拗，可能會（例如）有一部份嘅語言學家主張嗰隻語言嘅某啲文法變化雖然畀人稱之為「時態」，但係佢哋睇勻咗一大堆嗰隻語言嘅語句，發覺嗰啲文法變化似係標示緊「一件事件係咪完成咗」多啲，所以查實應該算係文法體至啱。

喺廿一世紀初，漢語一般畀人話係偏向似分析語^{[e 4]}，字詞傾向冇咩構詞變化可言。喺時態方面，多數嘅漢語都畀主流學者當係無時態語言^{[e 5]}——學者睇勻咗好多隻漢語，發覺佢哋大多數都並冇時態，頂攏就係好似粵語噉有文法體嘅現象。無時態語言依然可以表達「件事係咩時候發生嘅」呢方面嘅資訊，最直接嘅做法係加多幾隻字詞落語句度^[9]。用粵語做例：想像例句

「我坐喺度食魚生。」

可以變成

「尋日下晝三點，我坐喺度食魚生。」（表達咗過去）

「聽日朝早八點，我會坐喺度食魚生。」（表達咗未來）^{[註 5]}

——多咗嘅字詞，幫手表達「件事係喺乜嘢時候發生嘅」呢項資訊^[10]。

亦有部份嘅漢語畀學者話佢哋係有時態（或者至少類似時態嘅嘢）嘅，例子可以睇睇包括上海話在內嘅某啲吳語方言^[11]，以及係華北內陸地區嘅某啲漢語——包括咗山西嘅晉語以至係陝西嗰頭嘅某啲官話變體^[1]。

時態呢樣嘢喺歐洲嘅印歐語言^{[e 6]}當中好常見。

首先，廿一世紀初嘅日耳曼語言^{[e 7]}（屬印歐語言嘅分枝）有佢哋自己一套時態規律。以英文為例，英文嘅時態唔算複雜，假設唔當文法體（包括進行式同完成式）係時態嘅一部份嘅話，英文喺構詞上得過去同非過去兩個時態。英文以外嘅日耳曼語言，冚唪唥都起碼有過去同非過去之別，而且同英文一樣嘅係，佢哋傾向用助動詞或者情態動詞嘅方法嚟處理將來式，例如德文噉，德文都係一種日耳曼語言，佢哋有 werde 呢隻助動詞，喺時態功能上同英文嘅 will 頗為相似，都可以用嚟表示「句嘢講緊嘅事發生喺未來」呢一項資訊^[12]。例句^{[註 6]}：

Ich	esse	den	Salat	.
代名詞	動詞	指定冠詞	名詞
我	食	嗰盤 / 嗰啲	沙律

Ich	werde	den	Salat	essen	.
代名詞	助動詞	指定冠詞	名詞	動詞
我	會變成 / 將會	嗰盤 / 嗰啲	沙律	食

第一句係現在，而第二句係將來，表示緊相當於粵語「我將會去食嗰一盤沙律」噉嘅意思。

非日耳曼系嘅歐洲語言好多時都會喺構詞上有埋將來式，即係字詞表示將來式嗰時唔淨只係加個助動詞或者情態動詞咁簡單，而係會做詞形變化嚟表示將來式。包括羅曼語言^{[e 8]}（成員有法文、意大利文同葡文等）以及係蓋爾特語族^{[e 9]}嘅某啲成員（例如愛爾蘭話）都係噉。

時態並非歐洲語言獨有。以下呢啲非歐洲語言嘅語言，都被認為係有時態嘅：

• 印度-伊朗語族^{[e 10]}嘅多個成員^{[註 7]}，包括廣泛分佈於印度北部嘅印地話以及係伊朗官方語言波斯話；
• 阿拉伯話（屬於亞非語系^{[e 11]}）、
• 土耳其話（屬於突厥語系^{[e 12]}）、
• 日本話（屬於日本-琉球語系^{[e 13]}）...

等等。用日本話做例子。根據廿一世紀初嘅主流分析，日本話好似英文噉，動詞分做過去式同現在式兩種^[13][14]。例句：

花子	は	サラダ	を	食べます	。
Hanako	wa	sarada	o	tabemasu
代名詞	主題標記	名詞	標賓助詞	動詞
花子（人名）		沙律		食（現在式）

花子	は	サラダ	を	食べました	。
Hanako	wa	sarada	o	tabemashita
代名詞	主題標記	名詞	標賓助詞	動詞
花子（人名）		沙律		食（過去式）

喺實際應用上，過去式嗰一句往往會喺最前嗰度加返例如 kinou（平假名係きのう；漢字係昨日；意思係琴日噉解）等嘅字詞。除此之外，亦可以睇吓韓國話同土耳其話等嘅語言，呢啲語言同日本-琉球語系幾相似^{[註 8]}，而且都被指係有時態詞形變化嘅。

東南亞內陸地區（包括泰國、柬埔寨同越南等地）嘅語言，一般認為係傾向無時態嘅^[15]。

• 粵語嘅句尾助詞：粵語同好多東亞、東南亞嘅語言都有豐富嘅句尾助詞，句尾助詞有陣時會標示類似時態（例如文法體）嘅資訊。
• 構詞學同句法學：啲人通常會當時態係一種構詞現象噉睇，但係亦有啲學者將時態視為一種句法現象^[16]。
• 助動詞
• 能願
• 古仔

註解：

篇文提咗嘅重要詞彙，英文版本如下：

篇文引用咗以下嘅學術文獻同埋網頁：

有志攻讀語言學嘅學生，可以去摷吓以下嘅文獻嚟睇：

• （香港繁體） 【Simple Present Tense 簡單現在式】English Grammar 英文文法 | IELTS | DSE | 中學，粵語 YouTube 視頻講英文嗰啲時態。留意 YouTube 視頻通常都唔係嚴格嘅語言學，好多時會當咗（例如）完成式係一種時態。
• （香港繁體） 廣東話助詞超豐富！？表達時態的秘密在於⋯⋯？！，YouTube 視頻講粵語點樣表達時態嘅相關資訊。
• （英文） 構詞學上嘅時態同體，Oxford Research Encyclopedia
• （英文） 時態與體，史丹福哲學百科全書