政府廉租屋
政府廉租屋，全名政府廉租屋計劃（Government Low Cost Housing Scheme），係香港政府喺1962年至1973年推行嘅建屋計劃，由工務司署設計同埋起，起好之後由香港屋宇建設委員會負責管理。喺1973年，香港房屋委員會成立，政府廉租屋就歸入咗新成立嘅房委會管理，統一命名做「公共屋邨」，同時將所有前政府廉租屋邨同所有前屋建會屋邨列做「甲類屋邨」管理。
政府廉租屋嘅服務對象與徙置屋邨同屋建會廉租屋唔同，係為一啲入息低微唔合乎徙置資格，又唔合乎屋建會申請標準，住喺惡劣環境嘅人士提供穩定嘅居所[1]。同徙置屋邨唔同，徙置屋邨主要安置受天災、火災、天台或山邊木屋清拆嘅民居，少啲審核入住人士，唔多理對居民嘅改動、加建或者霸住走廊等行為。相反，廉租屋要同當局申請先有得住，所以對各方面都有嚴格限制，包括門窗顏色設計、內籠間格、窗花鐵欄、電線、鐵閘安裝等等，都要統一。
最後一個建成嘅政府廉租屋邨位於白田，嗰條邨嘅情況較特別，佢作為政府廉租屋出租嘅樓，係採用第六型徙置大廈設計，政府因而將條邨命名為「白田政府新邨」。
大廈設計
政府廉租屋並冇好似徙置屋邨咁分多款，但可以以外貌同內部設施嚟分兩種，分別係共用廁格同擁有獨立廁所兩種[2]。自1967年落成嘅牛頭角上邨開始，後期設計嘅政府廉租屋都採用右圖嘅款式，好似沙田坳邨、黃竹坑邨、元洲街邨等。
早期起嘅政府廉租屋，分為長型同單塔型，當中長型樓宇嘅公共廁所設喺大廈中間突出嘅部份，日後出現嘅第三型徙置大廈設計亦參照呢個設計，但徙置大廈設天台學校，政府廉租屋就冇。
後期起嘅政府廉租屋全部係長型設計，有升降機，但黃大仙上邨嘅東部五座同牛頭角上邨嘅第9至12座並冇獨立廁所，因此佢哋屬舊型同新型之間嘅過渡設計。將其他新型樓宇同埋同期起嘅第四至六型徙置大廈比較，政府廉租屋中間突出嘅樓梯位比徙置大廈短，窗同窗之間嘅距離睇落差唔多。由於後期設計嘅政府廉租屋樓宇，多數各座黐住，雖然各屋邨嘅大樓差唔多樣，但就會因應地盤大細作出唔同嘅安排，好似升降機大堂、樓梯嘅位置。從右面兩張圖片中，可見黃竹坑邨和元洲街邨雖然都係後期嘅設計，但樓梯嘅安排好唔同：黃竹坑邨第10座嘅樓梯喺大廈尾部，元洲街邨第六座嘅樓梯就喺大廈嘅中間。
就算政府廉租屋有升降機，但唔係停晒咁多層。好似元洲街邨第七座嘅兩組升降機咁，一組淨停地下，7樓同11樓，另一組就停4樓、8樓同12樓，大多數居民都要上落至少一層先返到屋企。
清拆
由於呢啲屋邨係喺1960至1970年代起，有關當局缺乏監管，甚至牽涉貪污，以至呢個時期嘅公共房屋偷工減料情況嚴重。去到1986年26座問題公屋醜聞[3]揭發，唔合規格嘅公屋有唔少係政府廉租屋樓宇，例如葵芳邨第8、9、10同11座、葵興邨第3-5座、葵盛東邨第18同20座、黃竹坑邨第9座、白田邨第14，15同16座等。當時，房屋署開始大規模檢驗全港公屋結構，發現當時樓齡5年以上800幾座公屋，有超過400幾座不合格。因此喺1987年，行政局通過長遠房屋策略，喺2001年前將所有第三至六型公屋大廈（徙置屋邨）同政府廉租屋清拆重建。[4]
隨住黃竹坑邨嘅九座樓（第1至8座、第10座）同埋葵盛東邨第12座被拆卸重建，政府廉租屋自此成為歷史。
政府廉租屋邨一覽
| 落成次序 | 屋邨名 | 地區 | 座數 | 落成年份 |
|---|---|---|---|---|
| 1 | 觀塘 (鯉魚門道) 邨 | 九龍觀塘 | 7 | 1962年 |
| 2 | 黃大仙上邨 | 九龍黃大仙 | 19 | 1963年 |
| 3 | 長沙灣邨 | 九龍長沙灣 | 13 | 1963年 |
| 4 | 石硤尾邨 | 九龍石硤尾 | 7 | 1964年 |
| 5 | 山谷道邨 | 九龍何文田 | 16 | 1964年 |
| 6 | 牛頭角上邨 | 九龍牛頭角 | 9 | 1967年 |
| 7 | 沙田坳邨 | 九龍黃大仙 | 2 | 1967年 |
| 8 | 黃竹坑邨 | 港島黃竹坑 | 10 | 1968年 |
| 9 | 石蔭邨 | 新界葵涌 | 8 | 1968年 |
| 10 | 元洲街邨 | 九龍長沙灣 | 8 | 1968年 |
| 11 | 葵興邨 | 新界葵涌 | 5 | 1970年 |
| 12 | 梨木樹邨 | 新界梨木樹 | 8 | 1970年 |
| 13 | 高超道邨 | 九龍觀塘 | 11 | 1971年 |
| 14 | 葵芳邨 | 新界葵涌 | 11 | 1971年 |
| 15 | 葵盛東邨 | 新界葵涌 | 9 | 1972年 |
| 16 | 何文田邨 | 九龍何文田 | 8 | 1972年 |
| 17 | 白田邨 | 九龍深水埗 | 6 | 1971年 |
參考
睇埋
- 香港公共房屋
- 廉租屋邨