應用行為分析
應用行為分析（applied behavioral analysis，ABA），又有叫行為工程（behavioral engineering），係一種科學性嘅技術，嘗試用古典制約同操作制約等嘅技巧嚟改變目標人物嘅行為[1]：由行為論（behaviorism）上對學習嘅研究已知，獎勵同懲罰能夠改變一隻動物嘅行為（以「做呢樣呢樣行為嘅頻率」、「做嗰樣嗰樣行為嘅頻率」等嚟反映），而應用行為分析就係將呢樣知識應用喺心理治療等嘅領域嗰度，以求改變人嘅行為，令病人做多啲「好」嘅行為同做少啲「唔好」嘅行為[2][3]。
應用行為分析成日俾心理學家攞嚟應付自閉症（autism）：根據研究，應用行為分析能夠有效噉幫有自閉症嘅人多啲同身邊嘅人交流、學新嘅技能同埋保持正面行為；一般嚟講，採用應用行為分析嚟處理自閉症最有效係密集式一個禮拜做超過 20 個鐘頭同埋响 4 歲打前做，不過呢種技術就算係喺大人身上都可以用[4][5]。
概念
古典制約
古典制約（classical conditioning）係指一個個體因為某兩個刺激持續噉一齊出現，而將兩個刺激聯想埋一齊（刺激同刺激之間嘅關係起變化；Stimlus-Stimulus），通常導致其中一個刺激（conditioned stimulus；CS）引起一啲本嚟淨係得另外嗰個刺激（unconditioned stimulus；US）會引起嘅反應（unconditioned response；UR）。舉個簡單例子說明[6]，
- 想像家吓研究者擺一隻大家鼠係一個實驗室嘅籠入面，個研究者定時定候電佢，佢唔使學習都會識得對俾人電有恐懼嘅反應；
- 又想像家陣個研究者改變佢個做法，變成每次喺電隻大家鼠之前都閃吓盞燈（已知燈閃本嚟係唔會引起恐懼反應嘅）；
- 實驗結果顯示，喺呢個情況之下，隻大家鼠話咁快就會學識對燈閃有恐懼嘅反應－即係話隻大家鼠個腦將「俾人電」同「燈閃」呢兩個刺激聯想埋一齊，令到原本唔會引起恐懼反應嘅「燈閃」（CS）引起「俾人電」（US）先會引起嘅恐懼反應（UR），係古典制約嘅經典例子[6]。
想像下圖：家陣有一隻狗，佢見到嘢食（US）會流口水（UR），但聽到鐘響（CS）唔會，打後次次有嘢食都俾佢聽鐘響，冇幾耐佢就學識一聽到鐘響就流口水。
古典制約嘅過程喺大多數動物物種甚至某啲植物嘅身上都觀察得到[7][8]，古典制約嘅過程令到生物能夠學識邊啲刺激傾向一齊出現，令到生物有能力預測周圍環境嘅變化。例如係有心理學實驗就顯示，人類喺撞到之前未遇到過嘅刺激嗰陣會留意呢啲刺激傾向同邊啲已知嘅刺激一齊出現，並且按呢個資訊對嗰啲新嘅刺激做判斷－例如家吓有個人 A 君，佢啱啱識咗個新朋友 B 君，如果 A 君每次撞到 B 君嗰陣都有啲令佢唔舒服嘅事發生嘅話（例如佢次次見親 B 君兩個人都嗌交），A 君好快會學識將 B 君同啲令佢唔舒服嘅事聯想埋一齊，學曉應該要避開 B 君[9]。
操作制約
操作制約（operant conditioning）係指一個個體因為對某個刺激起某個反應持續噉引致某啲後果，而將個刺激同嗰個反應聯想埋一齊（刺激同反應之間嘅關係起變化；Stimulus-Response），通常會導致嗰個刺激同個反應之間嘅關係變強或者變弱，會令反應變強嘅後果係所謂嘅強化（又或者叫「獎勵」；reinforcement），而會令反應變弱嘅後果就係所謂嘅懲罰（punishment）[10]。
舉個簡單例子說明，想像家吓研究者擺一隻大家鼠喺一個實驗室嘅籠入面，當個研究者擺啲嘢食入個籠入面（刺激）嗰陣，隻大家鼠會行埋啲嘢食（反應）嗰度，而家吓個研究者決定，每次當隻大家鼠行近啲嘢食嗰陣，佢就電吓隻大家鼠（但如果隻大家鼠唔行埋啲嘢食度，就唔電佢）；實驗顯示，噉做會令到隻大家鼠學識對「有嘢食」呢個刺激做「行埋啲嘢食度」呢個反應嘅話會俾人電，令到下次再出現「有嘢食」呢個刺激嗰時隻大家鼠做「行埋啲嘢食度」呢個反應嘅機會率下降，所以「俾人電」係一個懲罰。獎勵同懲罰嘅過程喺人身上都可以輕易觀察得到[10]。
拉雜概念
參考文獻
- John J. Wheeler; David Dean Richey (2013). Behavior Management: Principles and Practices of Positive Behavior Supports. Pearson Education, Limited. ISBN 978-0-13-285169-5.
- Steege, M.W.; Mace, F.C.; Perry, L.; Longenecker, H. (2007). "Applied behavior analysis: beyond discrete trial teaching". Psychol Schools. 44 (1): 91–99. doi:10.1002/pits.20208.
- Mayer, G. Roy; Sulzer-Azaroff, Beth; Wallace, Michele (2011). Behavior Analysis for Lasting Change (2/E ed.). Sloan. ISBN 978-1-59738-032-4.
- Catania, A. Charles (2007). Learning. Sloan. ISBN 978-1-59738-007-2.