張保仔

改「張保」呢個名係因為想佢平平安安，而粵人普遍鍾意將個「仔」擺喺名嘅尾嗰度，所以叫「張保仔」。佢本嚟係新會一個漁夫嘅仔，佢 15 歲嗰時跟佢阿爸出海捉魚，但係畀海賊鄭一捉走，後生嗰陣做咗佢嘅部屬。有傳因為鄭一係基嘅，竟然鍾意咗據講幾靚仔嘅張保，而且鄭一嫂（石氏）都鍾意張保，做咗個三角家庭，亦令到張保喺海賊之間嘅地位大大咁提升。有次鄭一撞啱颱風浸死－但係有人話係畀人謀殺。鄭一死咗之後，佢老婆石氏畀班屬下擁立，續佢老夫紅旗幫做首領。當時女人地位低啲，為咗鞏固自己嘅勢力，鄭一嫂請張保仔做助手。後嚟張保因為同鄭一嫂結埋婚，從此紅旗幫所有嘅領導權交由張保繼承。

經過赤鱲角海戰之後，張保嘅紅旗派勢力大跌。加上兩廣總督百齡借招安瓦解咗海賊之間互不侵犯嘅均勢，搞到黑旗幫、藍旗幫兩個幫一齊攻打紅旗幫。百齡委任千總周飛熊、花東苑帶檄文出海陳說^[1]。喺 1810 年二月，張保仔向官府提出投降，雙方談判所以中止咗。喺四月，鄭一嫂上廣州同百齡談判，協議接受招安，並且將艦隊集合喺香山縣外海芙蓉沙。四月二十日（1810 年 5 月 22 日），百齡去芙蓉沙嗰度接受張保仔同鄭一嫂嘅投降，計到海賊婦孺 17318 人、船 226 艘、砲 1315 尊、兵器 2798 件。張保仔改名做張保，滿清政府賞畀千總頂戴，保留 30 艘船私人艦隊^[2]，留喺廣東水師效力。六月三十日（7 月 30 日），因為捉到西路海賊烏石二立功，賞戴藍翎，以守備超等升補^[3]。1819 年四月，升授福建澎湖協水師副將^[4]。

張保升咗做澎湖副將之後，家眷亦都跟佢去澎湖度長住，生咗一個仔張玉麟同一個女。張玉麟後代喺澳門。

相傳話有好多同張保仔有關嘅遺蹟，尤其喺香港係有長洲、塔門、南丫島同舂坎角幾處，都有張保仔收埋咗啲金嘅傳說，最多人知嘅係長洲嘅張保仔洞。不過有人認為張保仔洞極之狹窄，根本埋藏唔到啲乜嘢寶物，所以張保仔洞查實只係躲避清兵追捕或者收埋火藥嘅地方。重有流傳話赤柱舂坎角嘅一間天后廟嘅神枱下面有一條畀張保仔走佬用嘅地道，但係而家已經畀人封咗。葉靈鳳喺《張保仔的傳說和真相》本書入面指出，張保仔旗下嘅海盜勢力喺全盛時期有成 300 艘戰艦，七萬幾個部眾。以張保仔嘅地位同聲勢，官兵都要忌佢幾分，張保仔冇可能亦都唔使匿喺陸地上嘅山洞，亦都冇可能將啲金銀財寶埋喺陸地度，佢認為香港故老口傳，有關張保仔藏寶嘅講法多數係傳說，而唔係事實。

除咗咁之外，據許地山教授考查，指出現今香港島嘅西營盤係當年張保仔營寨嘅舊名。但係呢個講法就畀香港作家葉靈鳳否定，指出西營盤呢個名，純係指開埠初期駐紮喺港島西區一帶嘅英軍軍營。喺港島歌賦山山腰，有張保仔舊時據守海島、用青磚同蠻石鑲砌而成嘅塹壕遺蹟。

最後，一條喺港島太平山山腰嘅古道，亦都畀人改名做「張保仔古道」，但係查實根本冇人知佢係咪真係同張保仔有啦掕。

日日都穿過維多利亞港嘅一艘運載旅客嘅三桅帆船就係以「張保仔」命名。

樂在棋中社會企業有限公司自從 2012 年起出版咗一系列以張保仔藏寶做主題嘅桌上遊戲同繪本故事，包括《張保仔傳說》、《張保仔傳說 2 藏寶香港》桌上遊戲、同埋《張保仔傳說》繪本故事書等。

• 張保仔洞
• 華南海盜
• 廣府民間故事