廖嬋娥
廖嬋娥(英文:Gladys Liu,1964年4月6號—)係澳洲自由黨政治人,喺英屬香港出世,2019-2022年係澳洲聯邦國會奇澤姆(Chistolm)嘅選區議員。
廖嬋娥 | |
---|---|
姓名原文 | Gladys Liu |
出生日 | 1964年4月6號 ![]() |
出生地 | 香港 ![]() |
國籍 | 澳洲 ![]() |
識嘅語言 | 英文 ![]() |
母校 | 拉籌伯大學、庇理羅士女子中學 ![]() |
職業 | 政治人 ![]() |
政黨 | 澳洲自由黨 ![]() |
[改維基數據] | |
喺當選議員之後,佢曾經因為被指控同中國共產黨嘅關係,受到傳媒關注,同埋引起咗一啲國家安全嘅討論。
早年生涯
佢喺1985年攞到獎學金去澳洲墨爾本拉籌伯大學(La Trobe University)留學,之後1992年歸化為澳洲公民,2002年加入自由黨。
政治立場同從政生涯
參選成為首名澳洲華裔聯邦眾議員
佢喺2019年澳洲聯邦大選入面,出選奇澤姆(Chisholm)選區,迎戰都係華裔嘅對手,工黨嘅楊千慧,喺競選期間,就曾經被工黨指責,喺微信上開展咗一場恐同同埋誤導性,危言聳聽嘅宣傳[2]。廖嬋娥最後險勝,成為首位華裔澳洲聯邦眾議員。
同中國共產黨嘅關係
喺佢2019年當選眾議員之後,有傳媒揭露佢喺2003至2015年曾經出任中國海外交流協會廣東分會同山東分會劇理事,而呢個協會係屬於中共中央統一戰線工作部,懷疑佢同中國共產黨關係密切。廖嬋娥一度否認事件,但之後又改口,話已經同協會斷絕連繫。[3][4]
另外,佢亦曾經公開推廣由中國在澳商人劉輝峰領導嘅澳洲緊急互援協會,個人同劉輝峰亦有密切關係。而去到2021年1月,澳洲緊急互援協會被報道收取中國駐墨爾本總領事館嘅資金,涉及中國政府滲透,畀澳洲安全情報局評估為對澳洲國家安全構成風險。劉輝峰亦面臨被驅逐出境[5][6]。
另外,喺2020年11月,澳洲政府引用《反外國干預法》控告維多利亞州多個華人團體嘅一名領導人物楊怡生,指控佢同外國情報機構有關,涉嫌企圖影響維州自由黨嘅人物。之後有傳媒報道,警方喺搜查令入面,特別點名提到要搵同廖嬋娥有關嘅證據[7]。
佢亦喺一次電視採訪節目入面,拒絕將中共中央總書記習近平承認為獨裁者。最開始佢迴避問題,而去到最後,佢話習喺中國政治體系入面係一個合法同埋被選舉上台嘅國家領導人[4]。
對香港問題態度方面,佢喺2019年香港反送中運動入面,曾經讚揚香港反修例示威者爭民主,但又話對香港所發生嘅事感痛心,呼籲以和平對話解決問題[8]。
由於佢被唔少人質疑佢嘅親中立場,喺2021年11月,有曾經參與香港反送中運動,其後返咗去墨爾本嘅民主運動抗爭者 Max Mok就表示,會喺接住落嚟嘅大選,出戰廖嬋娥嘅Chisholm 選區,嘗試將佢拉落馬。Max Mok表明,無論自己作為香港人定澳洲人,都要表明,絕對唔容許澳洲國會同政府入面,有任何人同中共統戰部有聯繫[9]。去到2021年12月,佢批評澳洲政府因應香港人權等問題採取強硬對華政策,杯葛北京冬奧,又話呢種政策會令自由黨輸好多澳洲華人票[10]。時事評論員黃世澤就批評,質疑佢到底仲係咪澳洲公民,係咪受到外國勢力嘅控制,如果佢有雙重國籍嘅話應該被DQ[11]。