威爾斯親王

威爾斯親王原先係威爾斯親王國嘅國王銜頭，源自羅馬時期嘅一個稱號「不列顛之王」。5世紀之後，羅馬人離開不列顛，令盎格魯-撒遜人乘虛而入，攻佔不列顛，不列顛文化分裂，形成唔同族群，其中最大嘅就係威爾斯。響後羅馬時期，唔同人響威爾斯建立咗好多王國，其中最為強大嘅國王會畀叫做「不列顛之王」。

而「威爾斯親王」呢個封號第一次出現係響1137年，由威爾斯親王國統治者格魯菲德·阿頗·卡南（Gruffudd ap Cynan）持有。自此之後，威爾斯親王國嘅統治者都會自稱為「威爾斯親王」。盧埃林大帝時期，威爾斯親王國遂漸形成同統一。盧埃林·阿頗·格魯菲德（Llywelyn ap Gruffydd）係最後一位被承認嘅威爾斯親王國統治者，佢響1282年嘅Orewin Bridge之戰陣亡後，威爾斯四分五裂，最終響1301年被愛德華一世征服。而最後一位自稱「威爾斯親王」嘅歐文·格林杜爾（Owain Glyndŵr）響1412年失蹤後，「威爾斯親王」正式成為屬於英格蘭嘅封號。

愛德華一世響征服威爾斯後，將「威爾斯親王」呢個封號封畀自己個仔加拿分嘅愛德華，而加拿分嘅愛德華成為第一位英倫嘅威爾斯親王。自此之後，英王都會封自己嘅皇位繼承人做「威爾斯親王」，久而久之就成為英國皇儲嘅同義詞。但「威爾斯親王」並唔係皇儲自動擁有，而需要在生嘅英王正式冊封先至可以擁有，而且係男性先至有，女性冇份，例如英女王伊利沙伯二世，登基前雖然係英國皇儲，但並未獲得「威爾斯親王」。

威爾斯親王嘅老婆通常叫威爾斯王妃。例外就係卡米拉，因為「威爾斯王妃」畀人普遍認為屬於已經過身嘅戴安娜，因此身為查理斯第二任老婆嘅卡米拉雖然擁有威爾斯王妃嘅稱號，但出席公眾場合嗰陣只會用「康和公爵夫人」呢個名號。

「威爾斯親王」封號響呢個時期由威爾斯親王國嘅統治者持有。

響盧埃林·阿頗·格魯菲德同達菲德·阿頗·格魯菲德先後戰死之後，威爾斯親王國被英王愛德華一世征服，但之後亦陸續有人自立為威爾斯統治者，宣稱自己先至係「威爾斯親王」。下面嘅表就係講緊自稱為親王嘅人，跟自稱嘅時期嚟排。