外交抵制2022年冬季奧運會
外交抵制2022年冬季奧運會通常被叫做「抵制北京冬奧會」或者「杯葛北京冬奧會」，係以美國為首嘅五眼聯盟同部份國家因為中國嘅人權問題，對喺北京舉行嘅2022年冬季奧運會發起嘅抵制行動。不過今次行動只係外交層面嘅抵制，參與抵制行動國家嘅運動員依然會參加冬奧會比賽。
背景
2015年中國申辦冬奧會期間，有受台灣政府資助嘅政治團體同民進黨籍立法委員田秋堇反對中國政府申辦2022年冬奧會，原因係中國近幾年人權狀況惡化。[1]北京申辦成功後，人權觀察對國際奧林匹克委員會選擇由中國主辦2022年冬季奧運會提出質疑，認為違背國際奧委會公開表達嘅人權承諾。[2][3]2018年，美國國會嘅行政當局中國委員會以中國「人權狀況嚴峻」、「同奧林匹克精神唔啱」為由，呼籲國際奧委會取消北京2022年冬奧會嘅舉辦資格[4][5]。
2020年8月13號，世界維吾爾代表大會透過英國人權大律師波拉克，正式向國際奧會提出書面申訴，話中國政府喺新疆嘅行為涉及種族滅絕，違反《奧林匹克憲章》，要求唔畀中國北京舉辦2022年冬季奧運。[6]
關注新疆維吾爾穆斯林人權嘅美國共和黨籍參議員里克·斯科特喺致美國參議院外交委員會嘅一封信入面話：「只要習近平總書記繼續堅持呢一條無法辯護嘅道路，共產中國絕對唔應該獲得2022年奧運會嘅舉辦權。」英國外交大臣藍韜文亦暗示，英國可能會抵制呢次冬奧會[7][8]。首相約翰遜就話，英國會喺聯合國領導國際行動，要求中國就人權問題承擔責任，但英國通常唔傾向杯葛體育活動，又話呢個係英國政府長久以嚟嘅立場。[9]
中國同澳洲關係喺2020年惡化亦令澳洲國內抵制呢屆冬奧嘅呼聲日漸高漲。2020年11月，兩個澳洲參議院議員正式提案抵制2022年北京冬奧，但最終提案被否決[10]。
2021年2月3號，全球180個國際人權組織發表公開信，集體向各國政府呼籲抵制中國主辦嘅冬季奧運會。信中提到中國國內嘅人權狀況喺習近平主政下日益惡化，又用新疆、西藏、內蒙古同香港做例子，亦提到中國對台灣嘅威脅，喺南海同中印邊境嘅軍事擴張。[11][12]
加拿大下議院喺2021年2月通過一項無約束力決議，認定中國對新疆維吾爾族嘅行動構成種族滅絕，同時表明如果中國維持當前對維吾爾族嘅待遇，就會呼籲國際奧委會取消北京主辦冬奧嘅資格。[13]另外，根據Research Co.喺2021年3月進行嘅一項調查，加拿大國內有54%嘅民衆認爲加國應該抵制北京冬奧，反對抵制嘅佔24%，另外21%話唔確定[14]。2021年6月10號，捷克參議院通過決議，話中國存在侵犯人權等問題，要求政府同政要唔出席呢屆冬奧[15]。
多個國際人權組織喺2021年2月3號發表呼籲抵制2022年北京冬奧嘅公開信之後，中國外交部回應話出於政治動機、干擾、阻礙、破壞呢屆冬奧嘅籌辦同舉行係非常唔負責任嘅做法，得唔到國際社會嘅支持[16]。同年3月4號，全國政協委員郭衛民喺第十三屆政協第四次會議嘅新聞發布會針對冬奧抵制問題亦回應話，個別政客將體育運動政治化、企圖干擾破壞呢屆冬奧嘅籌辦同舉行嘅做法有違奧林匹克憲章精神，注定唔會得逞[17]。
部份國家奧委會亦明確反對抵制呢屆冬奧。澳洲奧委會主席約翰·科茨曾經喺2020年10月向參議院外交、國防同貿易委員會提交咗一份24頁嘅信件，佢喺信件入面話澳洲奧委會唔支持抵制2022年北京冬奧，又反對任何會令組織一切活動受到限制嘅修正案[18]。加拿大奧委會主席表示對賽事主辦國發生緊嘅一啲事有所擔憂，但認為抵制奧運會帶嚟反效果[19]。美國奧運同殘奧委員會亦喺2021年2月發表聲明，話反對抵制運動會，因為事實證明咁樣對運動員產生負面影響，亦唔能有效處理全球問題[20]。英國奧委會亦表示唔相信抵制呢屆冬奧係正確嘅解決方法，又話運動員努力訓練只為參賽一刻，應該畀佢哋代表國家出賽，又用抵制1980年莫斯科運動會嘅做法為例子，證明抵制北京冬奧嘅做法行唔通，既令運動員受到懲罰，又唔能夠解決政治問題[9]。
2021年7月8號，歐洲議會通過一項抵制北京冬奧會嘅動議。歐洲議會認為，除非香港、新疆、西藏、內蒙古同埋中國其它地區嘅人權得到改善，唔係歐盟同埋成員國領導人唔好出席2022北京冬奧會[21][22]。7月15號，英國下議院同樣通過咗一項外交抵制北京冬奧會嘅動議，建議英國政府同代表拒絕參加北京冬奧會。英國下議院認為，除非中國政府結束喺新疆嘅暴行，解除對英國議員、公民同實體嘅制裁，唔係2022年冬奧會唔應該喺一個被指控犯有大規模暴行嘅國家舉辦[23]。
2021年9月7號，多個人權團體發表一封公開信，呼籲包括美國國家廣播公司在內嘅世界各大電視台取消轉播北京冬季奧運會嘅計劃[24]。
2021年11月3號，多個人權組織喺美國洛杉磯全國廣播公司總部前面舉行示威，要求全國廣播公司取消2022年冬季奧運會嘅轉播計劃[25][26]。
參與抵制嘅國家
2021年12月6號，美國白宮宣布唔會派官員出席2022年北京冬季奧運會，理由係中國鎮壓穆斯林少數民族群體同犯下其它侵犯人權嘅行為[27][28]。新西蘭同澳洲隨後同樣宣布唔派外交官出席北京冬奧。澳洲強調決定同中國人權問題同雙邊緊張關係有關，不過新西蘭態度保守，強調決定同美國無關[29]，新西蘭副總理羅伯森仲話，主要係考慮疫情因素，而且早前已經知會中方[30]。12月8號，英國同加拿大以中國人權狀況惡化為由唔派官員參加冬奧會。[31]以下國家宣布唔派政府官員出席北京冬奧會，當中有部份國家未畀出具體理由，或者只係畀出同政治問題無關嘅理由，下表包含聯合國會員國同有限承認國家：[32][33][34][35]
美國[36]（計劃派18個低級官員到中國喺冬奧會期間為美國隊提供安全支持[37]）
紐西蘭[38]
澳洲[39]
英國[40]
加拿大[41]
科索沃[註 1][42]
日本[43]（唔派政府官員，但派出東京奧運會同殘奧會組織委員會會長橋本聖子、日本奧委會會長山下泰裕、日本殘奧委會會長森和之出席[44]）
奧地利[45]
比利時[46]
立陶宛[47]
愛沙尼亞[48]
拉脫維亞[45]
瑞典[49]
丹麥[50]
荷蘭[51]
中華民國（
中華台北）[註 2]：話中華台北隊參賽人數有限，而且中華民國政府經常缺席冬奧[52][53]
印度：因參與中印邊境衝突嘅解放軍團長祁發寶獲安排做冬奧聖火傳遞手，印度外交部宣布印度駐北京外交使節唔會出席冬奧開幕同閉幕典禮[54]
.svg){kind=small}
另外全球超過200個團體向企業寫信，又喺企業辦公室外舉行抗議活動，要求企業中止對北京冬奧嘅贊助，但大多數企業因為商業利益而選擇沉默。[55]
國際奧委會嘅回應
對於部份國家同團體指責國際奧委會漠視中國人權狀況，國際奧委會反複強調話，組織必須喺政治問題上保持中立。國際奧委會發言人曾經喺2020年回應部份媒體詢問嗰陣話：「將奧運主辦權授予一個國家奧委會並唔代表國際奧委會認同呢個國家嘅政治制度、社會環境同人權標準。」[56][57]國際奧委會主席托馬斯·巴赫亦喺2021年3月話過，國際奧委會非常嚴肅看待人權問題，組織亦密切監察主辦方喺供應鏈、勞工權益、新聞自由等方面嘅情況，佢又話國際奧委會並唔係超級世界政府，唔能夠解決連聯合國、七國集團、二十國集團都冇辦法解決嘅問題[58]。另外，喺抵制參賽嘅問題上，國際奧委會持明確嘅反對態度。國際奧委會主席巴赫喺2020年7月嘅一次視像會議入面，話佢相信中國會信守喺人權上面嘅承諾，又話抵制奧運更多只係懲罰運動員，同時唔會帶嚟政治上嘅改變[59]。針對異議人士嘅抗議，北京冬奧會協調委員會主席小薩馬蘭奇話：「人人都有權利擁有自己嘅觀點、立場同原則，我只可以話，我哋對呢啲抗議活動發表評論，有啲人可能會同意，可能唔同意某啲事情，奧運就係要嘗試團結所有人。」
中國同其它國家嘅回應
2021年11月29號，中國環球時報透露，中國從未邀請過任何美國政治人物出席北京冬奧，當前亦冇相關邀請計劃，又話「冇呢啲西方反華政客嘅加入，北京冬奧會只會更精彩。」[60]
中國外交部發言人汪文斌喺2021年12月9號話：「中方原本就冇向相關國家發出邀請，佢哋嘅官員嚟或者唔嚟，都一樣會睇到北京冬奧會嘅成功舉辦。」法國總統馬克龍話，奧林匹克運動唔應被政治化，外交抵制北京冬奧會只係象徵效果，意義唔大。俄羅斯副總理車爾內申科話，美國企圖將北京冬奧會政治化，但奧林匹克運動唔會受到影響。[61]韓國外交部發言人喺12月7號話韓國始終支持北京冬奧會取得圓滿成功，而且一貫希望呢屆冬奧能夠為東北亞乃至全世界嘅和平穩定同韓朝關係發展作出貢獻。[62]阿根廷外交部亦喺12月9號話阿根廷政府堅定支持北京冬季奧運會[63]。12月22號，冰島外交部長祝賀北京冬奧會籌備工作進展順利，又話世界應該弘揚奧林匹克精神[64]。2022年1月5號，朝鮮奧委會同體育省向中國奧委會、北京冬奧組委、國家體育總局致信函，話因為敵對勢力嘅陰謀活動同全球傳染病大流行而唔能夠參加呢屆奧運會，但會全方位支持同聲援中國同志舉辦一屆隆重精彩嘅奧運盛會。”[65]德國就選擇唔派出高級別政治代表出席北京冬奧會開幕式。[66]瑞典宣布唔派任何政府代表參加北京冬奧，表示係受到疫情影響，而唔係外交杯葛。[67][68]聯合國秘書長古特雷斯、聯合國大會主席[69]、波蘭、俄羅斯、阿根廷總統、巴基斯坦總理、韓國國會議長同埋中國國民黨前主席洪秀柱會出席北京冬奧會開幕式。[70][71][72][73][74]捷克總統米洛什·澤曼支持北京冬奧會，又話反對奧運會政治化。[75]希腊奧委會表態支持同期待北京冬奧會。[76]
相比2008年北京夏季奧運會，今次前嚟參加冬奧會開幕式嘅國際級政要數字大幅縮水，出席名單畀歐洲議會議員比蒂科夫諷刺，又對波蘭總統講：[77]
| 「 | 呢個真係一個「輝煌」嘅名單，而家我依然希望波蘭總統杜達能夠明白，呢個唔係一個佢應該去湊嘅局，佢仲有時間改變主意。 | 」 |