基輔市冧列寧像
基輔列寧雕像倒塌事件，係指一件烏克蘭親歐盟示威者拉跌基輔市一座列寧雕像嘅事，發生響2013年12月8號下晝6:00（UTC+2）。呢個雕像響1946年落成，係基輔市最後一座列寧雕像。
經過
2013年12月8號上晝，親歐盟示威運動嘅組織者同反對派領袖希望組織100萬人上街遊行[1]，不過警方估計當日只有10萬人參加示威活動[2]。夜晚六點，一班年輕人架起樓梯，爬上雕像，喺列寧像條頸上面套上鐵繩，之後就拉跌佢[3][4]；雕像倒塌之後連手臂同頭部都跌落嚟[4]，隨後，尐人輪流用一把大錘敲個雕像，碎片散落一地，一度嗌「亞努科維奇，你就係下一個！」又唱住烏克蘭國歌。雕像嘅腿部重喺基座上面，有人爬上個基座，又揮舞烏克蘭國旗。響成個過程入面，警方無干預[5]。
反應
烏克蘭國內對呢件事反應不一。烏克蘭政府話係野蠻行徑，基輔市市長亞歷山大·波波夫話呢一件事係「一次破壞行為，同民主毫無關係」[6]。烏克蘭共產黨同樣譴責呢件事，而極右翼反對黨斯沃博達黨對呢件事嘅態度飄忽不定，官方Twitter賬號曾經話：「呢個係蘇聯佔領嘅終結，係羞恥而丟臉嘅政權嘅終結。」，但係領導人季亞尼博科認為係「無意義的自殺」[7]。
2013年12月嘅一份民意調查顯示，大部分（69%）嘅基輔民眾對事件持反對態度，持支持態度者佔13%，而中立者有15%[8]。
後續類似事件
受呢件事嘅啟發，烏克蘭國內其他地方亦都開始拉跌其他共產主義者嘅雕像[9]。2014年1月有至少4次類似事件[10]，2月份更加有百幾次類似事件[11]。