喜氣洋洋
《喜氣洋洋》係香港歌手徐小鳳嘅歌。隻歌改編自日本歌手五輪真弓嘅《恋愛ともだち》,由鄭國江填詞,吳智強編曲;收錄喺1979年推出嘅專輯《夜風中》。佢一直係為喜慶場合助興嘅歌,近年因多作「幸災樂禍」嘅用途而紅咗,做咗一個網絡迷因。
喜氣洋洋 | |
---|---|
徐小鳳嘅歌 | |
出版 | 1979年 |
時長 | 3:34 |
唱片公司 | CBS/Sony |
填詞 | 鄭國江 |
作曲 | 五輪真弓 |
編曲 | 吳智強 |
監製 | 李添 |
介紹
《恋愛ともだち》原本係一隻情歌,被徐小鳳翻唱,以非主打歌[1]收錄喺《夜風中》,係1970年代尾少有嘅粵語Band Sound歌。鑒於佢係夜總會歌手,鄭國江特登填成一隻喜慶場合歌助興曲[2]。《喜氣洋洋》亦被視為賀年曲[3],係徐小鳳新年嗰陣喺「紅館前身」海城夜總會必唱嘅熱門歌[4]。
據蘋果日報報導,《喜氣洋洋》喺1991年已略染上反諷嘅色彩,無綫電視劇《老友鬼鬼》張衞健演嘅鬼因梁藝齡飾演嘅女角就嚟死而嫁畀佢,唱咗呢隻歌。2000年代,隻歌開始被高登討論區會員用歌詞配搭高登圖示嚟嘲諷佢哋討厭嘅人物同組織,例如2009年患上人類豬流感嘅藝人鄧麗欣[5]。
2012年,民建聯嘅劉江華喺立法會選舉落選,市民到佢沙田區議員辦事處前播《喜氣洋洋》慶祝[6]。2015年,建制派立法會議員鍾樹根同葛珮帆落選區議會,網民到二人辦事處唱呢隻歌,被多間傳媒報導[7][8][9];建制派喺2019年區議會選舉大敗後都係咁[10][11]。
2016年2月,美籍香港歌手李玟喺《我是歌手4》第六集翻唱咗呢隻歌,並攞到嗰集觀眾票選第四名[12]。
有人問過鄭國江同徐小鳳嘅睇法,前者對呢隻歌再次翻紅覺得好開心,並對佢變咗做一隻「好百搭、好奀皮(頑皮)」歌歌覺得「莫名其妙」[13]。後者話網民「真曳曳」[14]。網民用《喜氣洋洋》幸災樂禍嗰陣,成日會講句「有請小鳳姐」做引子或借代全詞。2016年徐小鳳辦演唱會嗰陣就引嗰句說話做口號:「既然青春留不住,不如有請小鳳姐」[15]。