反人類罪

反人類罪，又叫做危害人類罪，係一種由某個權力推行嘅系統性咁違反人權嘅罪行，通常都係由一個國所犯。同戰爭罪唔同，反人類罪喺戰爭同和平時期都有機會犯^[1]。反人類罪一定唔可以係一次性或者獨立事件，而係需要有系統性嘅成分^[2]。呢啲唔一定要係明確嘅政策，只需要係暗地裏受政權保護已經足夠成立做反人類罪。

第一次有反人類罪被檢控，係喺紐倫堡審判期間，針對納粹德國嘅猶太人大屠殺政策。自從世界人權宣言喺1948年寫低咗，已經成爲咗一個國際人權嘅標準。除咗納粹德國之外，犯過反人類罪嘅政權仲有盧旺達、塞拉利昂、紅色高棉、同南斯拉夫等等。

奇怪嘅係，到依家都只係有成立咗國際刑事法院嘅羅馬規約，而反人類罪到今時今日，都冇一個國際性嘅定義，所以有唔少組織都喺度提議正式用條約嘅方式嚟成立一個標準定義。雖然係咁，不過大家一般都有一個大概嘅範圍，通常任何嘅侵略罪、戰爭罪、謀殺、大屠殺、種族滅絕、種族清洗、驅逐出境、國家恐怖主義、奴隸制、酷刑、强奸、政治迫害等等，只要係系統性咁實行，就會算係反人類罪。