倩女幽魂 (歌)
《倩女幽魂》係香港歌手張國榮喺1987年主唱嘅同名電影主題曲。呢隻歌由黃霑作曲填詞、戴樂民編曲。有粵語同國語兩個版本，歌詞大概有幾個地方有分別；前者收錄喺張國榮同年出嘅唱碟《Summer Romance '87》，後者就出現喺1988年出嘅唱碟《拒絕再玩》。呢隻歌提名過第7屆香港電影金像獎頒獎禮最佳電影歌曲。
| 倩女幽魂 | |
|---|---|
| 張國榮嘅歌 | |
| 收錄喺專輯《Summer Romance》 | |
| 發行日期 | 1987年 |
| 類 | 粵語流行 |
| 時長 | 3:30 |
| 唱片公司 | 新藝寶唱片 |
| 填詞 | 黃霑 |
| 作曲 | 黃霑 |
| 編曲 | 戴樂民 |
| 監製 | 張國榮、楊喬興 |
後來幾部《倩女幽魂》相關影視都引做主題曲，包括1995年嘅《倩女幽魂前傳》（歌手高勝美）、2003年嘅《倩女幽魂》（歌手陳曉東）、2011年嘅《倩女幽魂》（原版歌）同2020年嘅《倩女幽魂：人間情》（歌手阿雲嘎同劉惜君）[1]。
創作背景
張國榮講過歌名原本係《人生路茫茫》，但經理人陳淑芬覺得意頭唔好（諧音「亡」），張國榮想縮短做《人生路》，佢又話三個字嘅歌名唔「旺」佢，於是跟返電影同名去改[2]。
黃霑講過主旋律係佢同新藝城一班影人參觀法國康城影展嗰陣，一夜寫返嚟嘅，填好詞即刻通過[3][4]。歌詞寄予咗深意，「路隨人茫茫」寫嘅係當時香港人嘅心態[4]。
到錄歌嗰陣，樂器演奏方面有二胡家黃安源同琵琶師林風兩位音樂[4]。佢又形容張國榮錄音「快而準而好」，令唔同製作單位都滿意[5]。
派台同發行
張國榮所屬唱片公司新藝寶嘅老闆陳少寶喺網上電台節目入面講過，嗰陣已將主打曲《無心睡眠》派台，唔可以再派第二隻，但電影方就催佢盡快派台去宣傳電影，張國榮就認為電影上映嗰陣隻歌自然會熱播，嗰陣應該全力宣傳《無心睡眠》，令陳少寶覺得好難做；到《Summer Romance '87》唱碟出嗰陣，又錯誤咁將呢隻歌放喺最後一軌，令電影方好唔滿意[6]。
音樂特徵
隻歌嘅結構係「一段體」（即全曲唔分主副歌，齋以一個重重覆覆嘅樂段構成）[7]，並用小調調式寫出嚟，旋律舒緩[8]。編曲就係民族樂器、電子合成器同爵士鼓嘅混搭。中段達二分鐘嘅純樂器間奏，明報專欄作者孔昭形容「有濃厚交響樂味道」[4]，先係二胡、琵琶、古箏漸次加入演奏，然後音樂色彩劇變，鼓混合琵琶以相當一致嘅音高同節奏反覆演奏做十多次後，回歸平靜嘅人聲部分結束[9]。
評價
有論者認為詞人寫活咗寧采臣微妙迷茫嘅心態[10]，亦講咗「人生如夢的中國生死觀」[9]。騰訊網一專欄就認為黃霑以深厚嘅文言根基，「將東方古典的宿命主題，融入到略帶陰氣的旋律氛圍裡」，畀咗一部商業鬼片更深嘅內涵，產生出一隻經典嘅「中國風」歌[11]。
中國人民大學哲學院美學專業講師馮慶認為黃霑幫電影系列《倩女幽魂》而寫嘅歌，亦可以做互有關連嘅系列作觀。首先黃霑因「政治社會動盪對『快樂少年郎』嘅美夢探尋（《倩女幽魂》）可能造成嘅傷害引發咗『不許紅日，教人分開，悠悠良夜不要變改』（《黎明不要來》）嘅傷悼情緒」，再喺續集主題曲《人間道》表達咗因現實風波而激發嘅憤怒，最終喺第三部嘅主題曲《道道道》入面重建理想嘅政治心態[12]。
現場演繹
張國榮喺《百事巨星張國榮演唱會》同《張國榮告別樂壇演唱會》唱過呢隻歌。