佳藝電視
佳藝電視（Commercial Televsion），簡稱佳視，係香港嘅第三間免費商營電視台，喺1975年9月7號開台，1978年8月22號執笠。
| Asia Television Limited | |
 | |
| 開檔 | 1975年9月27號 |
|---|---|
| 執笠 | 1978年8月22號 |
| 總部地址 | 香港九龍廣播道1號A （而家係香港電台大廈） |
| 產業 | 傳媒 |
歷史
1973年8月10號，香港政府發出兩個無線電視經營權，其中佳藝電視得「中文電視台」經營權，而同時麗的電視得「中英文電視台」經營權；意味住佳藝電視同其他兩間電視台唔同，只得一個中文台。
佳視嘅台徽係以六個成 120 度嘅線條所組成嘅環狀六角形，代表古代中國儒家嘅「六藝」之中嘅禮、樂、射、御、書、數；同時亦代表佳藝電視嘅六個主要股東，分別係林炳炎（恒生銀行創辦人之一）家族（林氏家族喺1976年入股佳視）、怡和洋行、商業電台，以及香港三間當時最主要、同擁有好高公信力嘅親國民政府中文報社 ——「星島日報」、「華僑日報」同「工商日報」（當中只有星島日報至今仍然繼續出版，但現時立場已經變咗親中共）。喺六個股東當中，以商業電台擁有最大嘅主導權。商業電台更一度創辦「佳視足球隊」為佳視做勢，佳視執笠就冇咗；而當時任職商台嘅伍晃榮曾經係該隊嘅領隊。
佳視總部大廈係喺九龍廣播道 1 號 A（而家嘅香港電台電視大廈）。
當年佳視一推出《射雕英雄傳》，就轟動全港，米雪因為演活咗黃蓉一角，成為當時全香港最紅嘅女星，成為各大影視周刊最搶手嘅封面女郎，名氣日大，紅遍成個東南亞。佳視執笠之後，米雪旋即成為炙手可熱嘅女星，片約不絕，而當時麗的電視同埋無綫都爭相請米雪拍戲，最後由於無綫出價極高，所以請到米雪拍《絕代雙驕》。
執笠
1978年8月22號朝頭早，佳藝電視突然發表聲明，話要停止運作，並喺公司大門出面貼咗一張告示，話佳藝電視當日開始停業。
當時佳藝電視嘅發牌條件之一係佳視要將部分時間用做播放教育節目，係佳視搞到收支不平衡嘅原因之一。呢種情況同日本嘅兩間商營電視台好似—朝日電視台同埋東京電視台嘅前身都係商營嘅教育電視台。呢種牟利嘅教育電視台因為嚴重經營不善，兼且廣告收入比綜合電視台低，最終令佢哋喺1973年11月放棄教育功能，轉做綜合電視台。但係佳藝電視嘅情況就冇佢哋咁好彩，亦都好似喺度「宣告」商營教育電視頻道嘅「試驗」失敗。
然而喺大概2000年播出嘅亞洲電視劇集《電視風雲》裏面，就影射將佳視執笠原因，歸咎英治下香港政府，唔畀中資入股香港電子傳媒。
喺2007年3月播出嘅無綫電視節目《光影流情》裏面，就話佳視因為用咗太多成本製作節目，造成嚴重虧損而執咗。
佳視突然倒閉，令當時大部份職藝員唔知點算，佢哋更去到當時嘅港督府請願，要求政府伸出援手，協助復台；但最終都不得要領。結果佳視大批台前幕後精英分別加入無綫電視同埋麗的電視，為香港電視界日後嘅黃金時代寫下序幕。香港政府之後冇再發牌照，香港嘅無線廣播電視一直維持兩台（無綫電視；同埋麗的電視同埋第日改組而成嘅亞洲電視）爭雄嘅局面。
電視劇
佳藝電視製作過好多被電視迷視為經典嘅電視節目，包括有《射鵰英雄傳》、《神鵰俠侶》等。而佳視更係全世界第一間改編華文武俠小說成為電視劇嘅電視台；佢更加帶領潮流，率先改編金庸小說做電視劇集。一啲著名電視幕後人員同埋演員例如徐克、周梁淑怡、鄭裕玲都曾經喺電視台入面任職。
- 隋唐風雲（演員︰湘漪，鮑漢琳，劉丹，喬宏，馮淬帆，焦姣，秦沛）
- 武則天（演員︰湘漪，馮淬帆）
- 頂爺（演員︰劉丹）
- 追虎擒龍（演員︰湘漪，石天，劉丹）
- 明星（演員︰張瑪莉，曾江）
- 賭國仇城（演員︰歐嘉慧、劉丹）
- 獨行殺手（演員：陳強，陳惠敏）
- 鐵拐俠盜（演員：白彪）
- 廣東好漢（演員︰白彪，米雪，梁小龍）
- 射鵰英雄傳（演員︰白彪，米雪）
- 神鵰俠侶（演員︰羅樂林，李通明、白彪，米雪）
- 碧血劍（演員：陳強，文雪兒）
- 雪山飛狐（演員︰米雪、衛子雲（臺灣演員））
- 鹿鼎記（演員︰文雪兒，李通明，馬海倫）
- 萍蹤俠影錄（演員︰楊盼盼，陳強）
- 白髮魔女傳（演員︰李麗麗，白彪，魏秋樺，羅樂林）
- 武林外史（演員︰米雪，李通明，劉丹，劉江）
- 金刀情俠（演員︰余安安，黃韻詩，朱承彩，白彪）
- 名流情史（演員︰鄧碧雲，羅艷卿，白彪，米雪，韋基舜，鄭裕玲）
- 流星蝴蝶劍（演員︰魏秋樺，羅樂林，劉江，楊澤霖，馬海倫）
- 仙鶴神針（演員︰羅樂林，馬海倫，覃恩美，楊盼盼，秦沛，李通明）
- 紅樓夢（演員︰伍衛國，米雪，毛舜筠，黃蕙芬，吳沅儀，馬海倫，陶敏明，李通明，林燕妮，文雪兒，張寶之，朱承彩，羅樂林）
- 風雷第一刀（未拍好）（演員︰伍衛國，劉江，鄭雷，楊澤霖）
外購動畫
- 俏巴喇
- 七星俠（原名：ウルトラマンセブン）
- 世界童話集
- 大眼妹與波比
- 急救組卡通
301部隊時段
主要演員
執笠之後轉投無綫電視
佳藝電視傳聞
喺YouTube網站入面嘅香港10周年回歸紀念歌曲「始終有你」入面，有「佳藝電視寬頻一台」嘅標誌。因此傳出佳藝電視重開嘅傳聞。但係實際上，呢個標誌純粹係由網友自行加插。[1]