ტაზია
ტა'ზია (არაბ. تعزية — მენარღება) — ისლამს, ღურელიშ ფანიაშა დო მოჯგირეეფშა მენარღება. შიიტურ ისლამს ტაზია უჯოხონა რელიგიურ მისტერიაშა, თეატრალურ წჷმორინაფაშა მოჩქვაფირი მუჰამედიშ მოთაშ ჰუსეინ იბნ ალიშ მოწამებური ღურაშ გასაშინეთ.
![](http://upload.wikimedia.org/wikipedia/commons/thumb/2/21/Actors_of_Ta%27zieh_or_Condolence_Theater_in_Isfahan-_Ernest_Hoeltzer.jpg/220px-Actors_of_Ta%27zieh_or_Condolence_Theater_in_Isfahan-_Ernest_Hoeltzer.jpg)
მენარღება
მენარღება მეღებული რე ადამიერიშ ღურაშე პირველ სუმ დღა დო სერს. მენარღება უმოს გვიანო შილებე თიმ შვანს, დო მემანარღებელი კათა რზას რდეს ვარ-და შხვადოშხვა ბაძაძეფით კონკრეტულ ადამიერიშ ღურაშ გეშა გვიან გეგეს-და[1]. არძა სუნიტურ მაზჰაბის, მალიქიტურიშ მოხ, ვა რე მეღებული (მაქრუჰი) ართშე უმოსიშა მენარღება.
ტაზია ირსულებჷ ღურელიშ ფანიაშ დაშვიდებაშო. ღურელიშ მოჯგირეეფს მოუჭანუანა თვინებას (საბრი) დო თის, ნამჷ-და რინა დო ღურა ალაჰიშ ნებათ ხვადჷ. მოჩქვაფირ მუჰამედიშ ჰადისის რაგადი რე, ნამჷ-და ალაჰიშ მორწუმე ოსურს ვაშულებუ ეკონია დღასჷთ (ონგარუს), ღურელი ირგუას სუმ დღაშ უმოსი, დო ღურელი ქაჸაფუ ქომონჯი-და, ირგუას ოკო ოთხი თუთას დო ვითი დღას[2]. შანულამო ოკოროცხუ მენარღება ნთხორუაშ (ჯანაზა) უკული, მუჟამსჷთ ღურელიშ ფანია დო მოჯგირეეფი არძაშე უმოსო გჷნაფულენა ხვალეხობას დო ელარჷნას ოხვილჷნან. მენარღება შილებე ჸუდეს ვარ-და მეჩეთის, მარა ღურელიშ ჸუდეს გითოსერაფა, მუჟამსჷთ ღურელიშ ჸუდეს მეთმიანარღენთჷნ, ისლამს ვაშინერს.