ენდი სერკისი

ენდრიუ „ენდი“ სერკისი^[1] (დ. 20 პირელი, 1964) — ინგლისარი არტისტი დო რეჟისორი. თინა ჩინებული რე გოლუმიშ გასახიერებათ მარწკინდეფიშ მაზოჯალიშ ტრილოგიას, ნამუშოთ მიღჷ მუსხირენ ნომინაცია დო სატურნიშ პრემია საუჯგუშო არტისტიშო მაჟირახარისხამ როლს (2002). 2005 წანას თიქ ილაჸაფჷ კინგ კონგი პიტერ ჯექსონიშ ათე ჯოხონობაშ ფილმის. 2006 წანას გიშულირ ბრიტანულ ოტელევიზიე ფილმის, ლონგფორდი, თიქ არსულჷ ჩინებული ინგლისარი მაჸვილარიშ იენ ბრედიშ როლი, მუქით ორქოშ გლობუსიშ ნომინაცია მუღჷ.

ენდი სერკისი
ენდი სერკისი 2017 წანას
დაბადებაშ ჯოხო	ენდრიუ კლემენტ სერკისი
დაბადებაშ აბანი	ლონდონი, გოართიანაფილი ომაფე
დებადჷ	20 პირელი, 1964 (1964-04-20) (60 წანერი)
საქვარუა	არტისტი, რეჟისორი
აკოქიმინჯალაშ წანეფი	1989–ასეშა
ალმასქუ(ეფი)	ლორეინ ეშბორნი (2002 – ასეშა)

2011 წანას სერკისიქ ილაჸაფჷ ქიეფიშ პლანეტაშ ფრენჩაიზიშ ახალ ფილმის, ქიეფიშ პლანეტაშ ეულა.^[2] თინაქ ხოლო აკათჷ სტივენ სპილბერგიშ სურათის ტენტენიშ დუდსგინაველეფი: აკარქაშ ფულირი, 2012 წანას გასახიერჷ გოლუმი ჯ. რ. რ. ტოლკინიშ ჰობიტიშ ეკრანიზაციას.