გერონტოლოგია
გერონტოლოგია (ბერძ. γέρων (გერონ) შანენს "რჩინუ კოჩი"-ს, -λογία (-ლოგია) "გჷმორკვიება") — სირჩინუეშ სოციალური, კულტურული, ფსიქოლოგიური, კოგნიტური დო ბიოლოგიური ასპექტეფიშ რკვიება რე. ტერმინი გერონტოლოგია მიშეღჷ რუსი ზოოლოგიქ ილია მეჩნიკოვქ. გერონტოლოგიაწკჷმა არხოს რე მედიცინაშ დარგი გერიატრია, ნამუშ ღანკი რჩინუ ადამიერეფიშ ლახარეფიშ სქილადაფა რე.
![](http://upload.wikimedia.org/wikipedia/commons/thumb/e/ec/Altenpflege_02.jpg/220px-Altenpflege_02.jpg)
ოკითხეფს გერონტოლოგიაშ გეშა შეთმოფხვადუთ ისლამიშ ორქოშ ეპოქაშ მენცარეფიწკჷმა. იბნ სინა მუში შინელი ნახანდის "მედიცინაშ კანონი" ეთმოჭარუნს რჩინუეფიშ მუკოლუაფაშ ინსტრუქციეფს, შხვადოშხვა ლახარეფს, დიეტას დო შხვა. არაბი ექიმი იბნ ალ-ჯაზარი ეთმოჭარუნს რჩინუ ადამიერეფიშ მახასიათაფალ ლახარეფს, რულიშ დო შუენაშ პრობლემეფს, ღურაშ ბაძაძეფს.
ფრანგი ქიმიკოსი მიშელ-ეჟენ შევრელი (ნამუსჷთ 102 წანას უდგუდჷ შური) კოროცხუნდჷ ნამჷ-და სირჩინუე ოკო იგურუაფუდკო დო ირკვიებუდკო მენცარულო. გერონტოლოგიაშ ართ-ართ დჷმარსხუაფალო მერჩქინელი რე ილია მეჩნიკოვი, ნამუსჷთ გერონტოლოგიაშ მუმას ხოლო უძახჷნა. გერონტოლოგიაშ გოვითარაფაშა კაბეტი თია მიშეღჷ ამერიკალი ჯეიმს ბირენქ, ნამუშ ინიციატივათ დირსხჷ სირჩინუეშ ერუანულ ინსტიტუტიქ.
გერონტოლოგიაშ სუბდისციპლინეფი რე: ბიოგერონტოლოგია (გურაფულენს სირჩინუეშ ბიოლოგიურ პროცესეფს), სოციალური გერონტოლოგია, ენვირომენტალური გერონტოლოგია, იურისპრუდენციული გერონტოლოგია.