ალექსეი ნავალნი

ალექსეი ნავალნი (რუს. Алексей Анатольевич Навальный; დ. 4 მანგი, 1976, ოდინცოვკაშ რაიონიშ ოურდუმე ნოღა ბუტინი,^[1][2] მოსკოვიშ ოლქი,სსრრ^[3][4][5] — ღ. 16 ფურთუთა, 2024, ხარპი, იამალ-ნენეფიშ ავტონომიური ოკრუგი, რუსეთი) — რდჷ რუსი პოლიტიკოსი დო ოჯარალე მოღალე^[1][2], იურისტი,^[6] ინვესტ-აქტივისტი.^[7][8] „კორუფციაწკჷმა ბურჯაფიშ ფონდიშ“ დჷმარსხუაფალი. 2013 წანაშ 17 გერგობათუთაშე დუდენდჷ ლიბერალურ „პროგრესიშ პარტიას“.^[9] კომპანია „აეროფლოტიშ“ დირექტორეფიშ სხუნუშ ჸოფირი მაკათური.^[10] სახაროვიშ პრემიაშ ლაურეატი (2021). მოსკოვიშ მერიშ 2013 წანაშ გიშაგორუეფს მაჟირა აბანშა გიშართჷ 632 697 ხონარით (ხონარეფიშ 27,24%). გომორძგუა მაართა ტურს სერგეი სობიანინს დუთმჷ.^[11]

ალექსეი ნავალნი Алексей Анатольевич Навальный
დაბ. თარიღი	4 მანგი, 1976
დაბ. აბანი	ოფ. ბუტინი, მოსკოვიშ ოლქი, სსრრ
ღურ. თარიღი	ფურთუთა 16, 2024 (47 წანერი)
ღურ. აბანი	ხარპი (დაბა), იამალ-ნენეფიშ ავტონომიური ოკრუგი, რუსეთი
ერუანობა	რუსი
პარტია	პროგრესიშ პარტია
საქვარუა	პოლიტიკოსი
მუმა	ანატოლი ნავალნი
ნანა	ლიუდმილა ნავალნაია
ალმასქუ/ეფი	იულია ნავალნაია
სქუალეფი	დარია დო ზახარ ნავალნეფი
საიტი :	navalny.com

ალექსეი ნავალნი რუსეთის, თაშნეშე რუსულ დო ოერეფოშქაშე მასმედიას ჩინებული რდჷ მუჭოთ კორუფციაშ, რუსეთიშ პრეზიდენტი ვლადიმერ პუტინიშ დო თიში თარობაშ კრიტიკოსი.

2020 წანაშ 20 მარაშინათუთას, ნავალნი კომატოზურ დგომარობათ ომსკიშ ოსქილადეს ქჷდანჯირუეს დო ფიჟვეფიშ ხელუანური ვენტილაციაშ აპარატის ქემურსხუეს. თიში ბუნაშ გჷნაცხადით, თინა მოწამალეს. 22 მარაშინათუთას, გეგნიჸიონეს ოკურნალეთ გერმანიაშა.^[12] 2020 წანაშ 7 ეკენიას, გეგშართჷ კომაშე.^[13]

2021 წანაშ 11 ღურთუთას, რუსეთის საჯიშ არსულაფაშ ფედერალურ ბიუროქ სასამართალოს მიკართჷ, ნამჷ-და ნავალნიშ პიჯობური ბრალი, ნამუთ მან ივ როშეშ საქმეშენ მიღჷნ, რეალურით დუთირუდესკონ. 17 ღურთუთას, ნავალნი მოსკოვიშ აეროპორტის ოჭოფეს, მუჟანსჷთ თინა გერმანიაშე ირთუდჷნ. ჭოფუაშე მაჟირა დღას, პოლიციაშ გჷმნართის მანჯებულჷ სასამარათლე პროცესიქ თინა 30-დღათ ქუდახუნჷ. სასამართალოქ სუმ წანმოწანა დო გვერდი ქემუსაჯჷ. საჯის მარკჷ 10 თუთაქ, ნამუთ თიქ დინოხხვილიშუას მანჯჷნ დო საბოლათ 2 წანა დო 8 თუთაქ მიესაჯჷ. თეშ მოხ, რუსეთის ოპოზიციონერიშ სააწმარნეჯოთ ქვირთოსანუაშ ბირგულით გონწყეს საქმე, ნამუთ კინე მუში ფონდეფიშე ფარაშ ლოლუას ოწაწუდჷ.^[14]