漢姓

古代姓搭氏是兩樣个，先有姓再有氏，姓是母系个末，氏是父系个。

周朝前頭末，贵族除脫仔有姓，还有國名、官位作爲氏。通常說話貴族㑭赐封着土地咾會得立氏。

在扗夏商周三個朝代，男子称氏末，女子称姓个。氏用来区别贵咾贱，贵族有名有氏，贫民有名嘸氏。姓末用来区别婚姻个，同一個姓个弗好通婚。

春秋战国个辰光，宗法制度崩脫，姓氏制度也跟牢着变革；箇個辰光开始，氏转变成功姓。战国以后，平民也有姓爻，所以「百姓」成为民众个通称。

秦汉以后末，姓与氏合併爻，叫「姓」咾「姓氏」。姓氏与名一道組成功一個儂个姓名。

按照史家个研究，姓扗五六千年前頭个母系社会起源个，沿用部落个名称咾部落首领个名字。爲之上古八大姓全是從「女」字偏旁，譬如姒、姬、嬴、姜、姚咾啥。姓个用場末主要是爲着便當分辨部落裏向弗同氏族个后生，方便彼此通婚。

氏个出现講是扗传说裏向个黄帝时代就有爻，扗信史裏向末要從周朝開始哉。周朝初期，周王大规模分封诸侯，末以後箇星诸侯国个後人就拿国名作爲氏。诸侯又分封領地畀官员，箇星官员个后裔就拿封地作爲氏。

汉人從郑和下西洋以来，几百年个移民历史有爻。箇星明朝移民个后裔咾清末民初个南部汉族移民在扗海外地区，特別是东南亚地区，全沿用着汉姓。箇星汉姓到着东南亚地区，因为行政个需要，定要用罗马字母拼写个。箇末当时因为北方话扗南方汉族裏丄弗算普及，也嘸沒标准个普通话读音，所以用罗马字母拼汉姓个辰光，通常全是按自家祖籍地个閑話拼写个。譬方講，东南亚頂常见个两隻汉姓「陈」搭「林」用个是闽南语个“Tan”搭“Lim”。要是姓氏持有者个祖籍地講个是粤语，上頭两隻姓氏个拼写會是“Chan”搭“Lam”。箇種用南方汉语語言拼写个姓氏扗东南亚地区一直用到着今朝。扗官話拼音普及之前，东南亚華人个整个名字全是用南方漢語拼寫个。譬如“陈国强”寔隻名字个闽南语拼写是“Tan Kok Keong”。近瑲世，因为官話个強勢搭仔漢語拼音普及，有星人擔名字个拼音改成功漢語拼音，但弗過姓氏拼音仍然保留南方漢語。“陈国强”箇个名字个闽南语-普通话混合拼写方式是“Tan Guoqiang”。

在扗香港搭澳門，名字主要是用粵語音譯个，香港政府使用港府拼音來確定人名地名个拼寫，箇套拼寫是基于标准罗马字个，搭粵語邮政式拼音交關像。澳門个拼寫基本搭香港一樣个，一星拼寫改成功葡萄牙語个習慣，譬方用V代替W。

在扗中國內地，現在使用漢語拼音拼寫人名。在扗臺灣，漢名有多種拼音習慣，主要是沿用威妥瑪拼音，也有混合通用拼音、國語羅馬字、漢語拼音个，另外也有使用臺語等其他語言拼寫个，如萧美琴佢个姓用个是威妥瑪拼音个Hsiao，名用个是臺羅拼音个Bi-khim。

用吳語發音來拼寫姓氏有歷史爻，老法頭裏在扗明代，徐光啓就擔自家个名字寫成工 Paul Zi^[1]，徐家匯也從佢得名个。

自上海開埠搭浙江沿海通航以來，外國生意人咾外國傳教士就開始用羅馬字母拼寫吳語爻。其中以上海话教会罗马字搭台州话罗马字爲突出。有弗少吳越人也用扗居吳語發音來拼寫名詞。中华民国外交家顾维钧个外文名就寫个是 Vi Kyuin Koo. 蘇州存養書院創辦人曹子實擔名字个部分寫成功 Tsao Tz-zeh，名个部分是吳語。還有前香港特首董建華 Tung Chee-Hwa 、天主教香港教区荣休主教陳日君 Zen Ze-kiun、祖籍上海个华裔美籍物理学家徐一鸿 Anthony Zee 也是用吳語發音拼寫佢拉个名字个。

中華人民共和國推廣普通話搭仔推行漢語拼音以後，所有个儂全只好用漢語拼音作爲正式个外文名。但弗過近些年，有星吳越人扗居爭取使用吳語拼寫姓名个權利。

下底是一份畀參考个常見姓氏拼寫表：