مصطفی ثالث

30 اکتوبر 1757ء کو سلطان عثمان ثالث کی وفات کے بعد مصطفیٰ ثالث سلطنت عثمانیہ کے چھبیسویں سلطان کی حیثیت سے حکمران مقرر ہوئے۔تخت نشینی کے وقت سلطان کی عمر چالیس سال سے زائد ہو چکی تھی۔ اگرچہ مصطفیٰ ثالث ایک طویل عرصہ تک توپ کاپی محل کے ایک گوشے میں نظربند رہے مگر فطری طور پر وہ نہایت باصلاحیت اور قابل انسان تھے۔ ابتدائی چھ سالوں میں نظامِ سلطنت قوچہ راغب پاشا کے ہاتھوں میں رہا اور یہ عرصہ سلطنت عثمانیہ کے عروج و ترقی کا زمانہ تھا۔

قوچہ راغب پاشا سلطان محمود اول کے آخری دور میں صدر اعظم رہ چکا تھا۔ اپنی غیر معمولی لیاقت و ذہانت، تدبر اور حُسنِ انتظام کے لحاظ سے وہ صدراعظم محمد صوقوللی پاشا اور دوسرے کوپریلی وزراء کا ہم پلہ شمار کیا جاتا ہے۔چنانچہ سلطان مصطفیٰ نے وزارت پر راغب پاشا کوہی برقرار رکھا اور اپنی بہن صالحہ سلطان کا عقد راغب پاشا سے کر دیا۔ اپنی وفات تک اُس نے سلطنت عثمانیہ کو دوسری سلطنتوں کی آویزش سے محفوظ رکھا اور قیامِ امن کے ساتھ پوری توجہ سلطنت کی فلاح و بہبود پر صَرف کرتا رہا۔8 اپریل 1763ء کو راغب پاشا نے وفات پائی۔

• محمود اول
• عثمان ثالث
• قوچہ راغب پاشا
• سلطنت عثمانیہ

 یہ ایک نامکمل مضمون ہے۔ آپ اس میں اضافہ کر کے ویکیپیڈیا کی مدد کر سکتے ہیں۔

سانچہ:عثمانی شجرہ نسب