Nakunan

Ang nakunan o kunan ay ang likas na pagtatapos o pagkabigo ng pagdadalangtao o pagbubuntis ng isang babae, tao man o hayop. Sa tao, nagaganap ito kung nangyari ang hindi sinasadyang pagkalaglag ng sanggol (ang fetus) mula sa sinapupunan ng ina bago sumapit ang wakas o katapusan ng ika-dalawampu't pitong linggo.^[1] Sa mahigpit na kahulugan, ito ang naganap na hindi sinasadyang pagtatapos ng pagkabuntis sa pagitan ng hulihan ng ika-labindalawang linggo at katapusan ng ika-dalawampu't pitong linggo, o ang pagkawala o pagkahulog ng namumuo pang sanggol sa wakas ng ika-labindalawang linggo.^[1] Tinatawag din itong agas (hindi sinasadya), pagkaagas, hindi sinasadyang aborsyon, pagkakakunan, (hindi inaasahang) pagkalaglag, o pagkabigo (sa pagbubuntis).^[2]