Градиенти бод

Градиенти бод — ивазшавии бузургии суръат ва (ё) самти бод ҳангоми дар минтақаҳои нисбатан хурди атмосфера сахт тағйир ёфтани онҳо.

Ду намуди градиенти бод — уфуқӣ ва амудӣ мавҷуд буда, уфуқиаш, одатан, дар манотиқи фронтҳои атмосферӣ ва амудиаш дар сатҳи Замин бештар мушоҳида мешавад (ҳарчанд онҳо ҳам дар манотиқи ҷараёнҳои шарравии баланд ва ҳам дар қитъаҳои баланди фронталии бодҳо хеле бузург шуда метавонанд). Градиенти бод зуҳуроти микрометеорологӣ буда, фақат дар масофаҳои хурд ҷой дорад, вале метавонад бо равандҳои ҷадвалҳои мезо- ва синоптикӣ алоқаманд бошад. Аз ҷумла он бештар бо хатти тундбодҳое, ки шадидбодҳои кӯтоҳмуддати раъдубарқӣ ба вуҷуд меоранд, ҳаракати фронтҳои атмосферии бод, ҷараёнҳои шарравии сатҳашон паст, ноҳияҳои шамолҳои сахти маҳаллӣ алоқаманд аст. Градиенти бод ба парвозу фурудоии тайёраҳо таъсир расонида, дар авиатсия омили хеле хатарнок мебошад. Аз таъсири градиенти бод инчунин самти ҳаракати мавҷи садо тағйир меёбад. Градиентҳои пуршиддати бод ташаккулёбии сиклонҳои тропикиро фурӯ нишонда, ба ташаккули сиклонҳои берунитропикӣ мусоидат менамоянд ва давомоти раъду барқро зиёд мекунанд.