బెన్ ఫోక్స్

ఫోక్స్ ఎసెక్స్‌లోని కోల్చెస్టర్‌లో జన్మించాడు. టెండింగ్ టెక్నాలజీ కాలేజీలో చదువుకున్నాడు. ^[3] అతని తండ్రి ఇంగ్లీష్ ఫుట్‌బాల్ ప్రీమియర్ లీగ్ రిఫరీ, పీటర్ ఫోక్స్.

2011 ఇంగ్లిష్ సీజన్‌లో, ఫోక్స్ ఎసెక్స్ తరపున ఫస్ట్-క్లాస్ మ్యాచ్‌ శ్రీలంకతో ఆడాడు. ^[4] అతను ఎసెక్స్ తొలి ఇన్నింగ్స్‌లో తిసారా పెరీరా చేతిలో 5 పరుగుల వద్ద ఔటయ్యాడు. అతను కీపరుగా మూడు క్యాచ్‌లు తీసుకున్నాడు. ^[5] 2011 సెప్టెంబరులో, అతను 2013 వరకు కొనసాగిన ఒప్పందంపై సంతకం చేశాడు ^[6]

2014 ఆగస్టు 14న, ఫోక్స్ సర్రే కౌంటీ క్రికెట్ క్లబ్‌లో చేరాడు.

ఫోక్స్ 2011 జనవరిలో ఇంగ్లండ్ అండర్-19 కి రంగప్రవేశం చేసాడు, ఇంగ్లండ్ శ్రీలంక పర్యటనలో శ్రీలంక అండర్-19 తో రెండు యూత్ టెస్టు మ్యాచ్‌లు ఆడాడు. ^[7] ఈ పర్యటనలోనే అతను యూత్ వన్ డే ఇంటర్నేషనల్ రంగప్రవేశం చేశాడు. ఇప్పటి వరకు, అతను ఆ ఫార్మాట్‌లో ఆరు ప్రదర్శనలు ఇచ్చాడు. 2011 జూలైలో అతను దక్షిణాఫ్రికా అండర్-19కి వ్యతిరేకంగా మూడు యూత్ వన్ డే ఇంటర్నేషనల్స్ ఆడాడు.^[8]

2017 సెప్టెంబరులో, అతను 2017–18 యాషెస్ సిరీస్ కోసం ఇంగ్లండ్ టెస్టు జట్టులో ఎంపికయ్యాడు. అయితే, అతను అంతర్జాతీయ మ్యాచ్‌లలో దేనిలోనూ ఆడలేదు. ^[9] 2018 అక్టోబరులో అతన్ని, శ్రీలంకతో సిరీస్ కోసం ఇంగ్లాండ్ టెస్టు జట్టులోకి తీసుకున్నారు. ^[10] 2018 నవంబరు 6న శ్రీలంకతో జరిగిన మ్యాచ్‌లో ఇంగ్లండ్ తరపున రంగప్రవేశం చేసాడు.^[11] మొదటి ఇన్నింగ్స్‌లో 107 పరుగులు చేసాడు. ^[12] అతను ఇంగ్లండ్ తరఫున టెస్టుల్లో రంగప్రవేశం చేసిన మ్యాచ్‌లోనే శతకం చేసిన 20వ బ్యాట్స్‌మెన్. మాట్ ప్రియర్ తర్వాత అలా చేసిన రెండవ ఇంగ్లాండ్ వికెట్ కీపరు. మొత్తం మీద ఐదవ కీపర్-బ్యాట్స్‌మన్. ^[13]

2019 ఏప్రిల్లో, ఫోక్స్‌ను ఐర్లాండ్‌తో జరిగిన వన్-డే ఇంటర్నేషనల్ (వన్‌డే), పాకిస్తాన్‌తో జరిగిన వన్-ఆఫ్ ట్వంటీ 20 ఇంటర్నేషనల్ (T20I) కోసం ఇంగ్లాండ్ జట్టులోకి తీసుకున్నారు.^[14] 2019 మే 3న ఐర్లాండ్‌పై ఇంగ్లండ్ తరపున తన వన్‌డే రంగప్రవేశం చేసి, 61 నాటౌట్ స్కోర్ చేసి, రెండు క్యాచ్‌లు, ఒక స్టంపింగు చేసాడు. మ్యాన్ ఆఫ్ ది మ్యాచ్ అవార్డు పొందాడు. ^[15] అతను 2019 మే 5న పాకిస్తాన్‌పై ఇంగ్లాండ్ తరపున తన T20I రంగప్రవేశం చేసాడు ^[16]

2020 మే 29న, COVID-19 మహమ్మారి తరువాత ఇంగ్లాండ్‌లో ప్రారంభమయ్యే అంతర్జాతీయ మ్యాచ్‌లకు ముందు శిక్షణను ప్రారంభించడానికి 55 మంది ఆటగాళ్ల బృందంలో ఫోక్స్ పేరు పెట్టారు. ^{[17] [18]} 2020 జూన్ 17న, వెస్టిండీస్‌తో జరిగే టెస్టు సిరీస్ కోసం శిక్షణను ప్రారంభించడానికి 30 మంది సభ్యులతో కూడిన ఇంగ్లాండ్ జట్టులో ఫోక్స్‌ను తీసుకున్నారు.^{[19] [20]} 2020 జూలై 4న, సిరీస్‌లోని మొదటి టెస్టు మ్యాచ్‌కు తొమ్మిది మంది రిజర్వ్ ప్లేయర్‌లలో ఫోక్స్ ఒకరిగా ఎంపికయ్యాడు. ^{[21] [22]}

2021 ఫిబ్రవరిలో, రెండవ టెస్టు నుండి జోస్ బట్లర్ గైర్హాజరుతో ఫోక్స్ ఇండియాతో ఇండియాలో జరిగిన టెస్టు సిరీస్‌లో కనిపించాడు. చెన్నైలో జరిగిన రెండో టెస్టులో ఫోక్స్, మూడు స్టంపింగ్‌లు చేశాడు. ఆసియాలో అలా చేసిన మొదటి ఇంగ్లీష్ కీపర్‌గా నిలిచాడు. ఒక మ్యాచ్‌లో అత్యధిక స్టంపింగ్‌లు చేసిన ఇంగ్లీష్ రికార్డును సమం చేశాడు. ^{[23] [24]}

ఫోక్స్ తన తొలి స్వదేశీ టెస్టు సిరీస్‌ను ఆడేందుకు వరుసలో ఉన్నాడు గానీ స్నాయువు గాయం కారణంగా అతను 2021లో న్యూజిలాండ్‌తో జరిగే సిరీస్ కోసం ఇంగ్లాండ్ టెస్టు జట్టులో భాగం కాలేకపోయాడు. ^[25] 2022లో న్యూజిలాండ్, దక్షిణాఫ్రికాలతో జరిగిన హోమ్ టెస్టు సిరీస్‌లలో మొదటి ఛాయిస్ వికెట్-కీపర్‌గా ఆడాడు. స్టంప్‌ల వెనుక, బ్యాట్‌తోనూ ముఖ్యమైన సహకారాన్ని అందించాడు. దక్షిణాఫ్రికాతో జరిగిన రెండో టెస్టు విజయంలో అతను ఏడు క్యాచ్‌లు, 113 నాటౌట్‌తో ప్రశంసలు అందుకున్నాడు. ^[26]