పిన‌ర‌యి విజ‌య‌న్

పిన‌ర‌యి విజ‌య‌న్ 1945, మే 24న కేరళ రాష్ట్రం, మలబార్ జిల్లా (అప్పటి మద్రాస్ ప్రెసిడెన్సీ), పినరాయి గ్రామంలో జన్మించాడు. విజ‌య‌న్ తండ్రి మరోలి కోరన్, క‌ల్లుగీత కార్మికుడు, తల్లి కళ్యాణి, గృహిణి. వారికి 14వ సంతానంగా ఆయన జ‌న్మించాడు. ఆయన పెర్లాసరీ హైస్కూల్లో ప్రాథమిక విద్య, బ్రెన్నాన్ కాలేజీలో బీఏ పూర్తి చేశాడు.

పిన‌ర‌యి విజ‌య‌న్ 1979లో కమల విజయన్ ను వివాహమాడాడు. కమల విజయన్ రిటైర్డ్ టీచర్. విజయన్ దంపతులకు ఇద్దరు సంతానం వీణ, వివేక్ కిరణ్, పి.ఎ.మొహమ్మద్‌ రియాస్‌ (అల్లుడు) ఉన్నారు.^[5]

విజ‌య‌న్ పెరాలస్సెరీ ఉన్నత పాఠశాలలో విద్యాభ్యాసం పూర్తి చేశాడు. ఆయన బ్రెన్నెన్ గ‌వ‌ర్న‌మెంట్ కాలేజీలో చదువుతున్నప్పుడే క‌న్నూరు జిల్లాలో విద్యార్థి నాయ‌కుడిగా పనిచేశాడు. ఆయన 1964లో కేరళ స్టూడెంట్స్ ఫెడరేషన్ క‌న్నూరు జిల్లా కార్యదర్శిగా పనిచేశాడు. 1964లో విజ‌య‌న్ సీపీఎంలో స‌భ్య‌త్వం తీసుకున్నాడు. ఆయన జిల్లా కమిటీ, జిల్లా సెక్రటేరియట్‌లలో సభ్యునిగా బాధ్యతలతో పాటు పార్టీలో పలు పదవులు చేపట్టాడు. 1986లో కన్నూర్ జిల్లా సెక్రటరీగా ఎన్నికయ్యాడు. ఎమెర్జెన్సీ సమయంలో ఆరోపణలు ఎదుర్కొని జైలు జీవితం గడిపాడు. విజ‌య‌న్ 25 ఏళ్ల వ‌య‌సులో 1970లో కూతుపరంబ నియోజకవర్గం నుండి పోటీ చేసి తొలిసారి ఎమ్మెల్యే అయ్యాడు. 1998లో కేరళ రాష్ట్ర కార్యదర్శిగా ఎన్నికై ఈ పదవిలో 2015 వరకు కొనసాగాడు.

విజయన్ 2016 మే 25న కేరళ రాష్ట్ర 12వ ముఖ్యమంత్రిగా బాధ్యతలు చేపట్టాడు. 2021లో జరిగిన కేరళ అసెంబ్లీ ఎన్నికల్లో ధర్మదోమ్ నియోజకవర్గం నుండి పోటీ చేసి తన సమీప ప్రత్యర్థి సి.రఘునాధన్ (కాంగ్రెస్) పై 50,123 ఓట్ల మెజారిటీతో గెలిచాడు.