ఖ్వాజా బందా నవాజ్

ఖ్వాజా బందా నవాజ్ లేదా ఖ్వాజా బందేనవాజ్ (ఆంగ్లం : Hazrat Khwaja Bande Nawaz), ఇతని బిరుదు గేసూ దరాజ్; గేసూ=కేశాలు, దరాజ్=పొడవాటి, అనగా పొడవాటి కేశాలు గల సూఫీ. జననం సా.శ. 1321 మరణం 1422, భారతదేశానికి చెందిన ఒక ప్రసిద్ధ సూఫీ సంతుడు, సహనం, సర్వమానవ ప్రేమ, సూఫీ తత్వము బోధించిన జ్ఞాని. చిష్తియా తరీఖాకు చెందిన సూఫీ.

తనపూర్వీకులైన సయ్యద్ అబుల్ హసన్ జుంది, ఖురాసాన్ నుండి భారత్ వచ్చి స్థిరపడ్డాడు. గేసూ దరాజ్, తన తండ్రి సయ్యద్ ముహమ్మద్ హుసేనీకి రెండవ కుమారుడు. గేసూ దరాజ్ సా.శ. జూలై 30 1321 / హి.శ. 4 రజబ్ నెల, 721 న ఢిల్లీలో జన్మించారు. గేసూ దరాజ్ తన జీవితమంతా సర్వమానవ సౌభ్రాతృత్వం బోధించే ఇస్లామీయ తత్వాన్ని బోధిస్తూ జీవించారు. అందుకే ఇతని ఉర్సు కు, కుల మత భేదాలు లేకుండా, ఇతన్ని గౌరవించే భక్తులందరూ విచ్చేస్తారు. ఇతని సమాధి (దర్గా) కర్నాటకలోని గుల్బర్గాలో గలదు.