வீரசேனர்

ஆச்சாரிய வீரசேனர் 8 ஆம் நூற்றாண்டைச் சேர்ந்த இந்திய கணித மேதை. இவர் சமண தத்துவ ஞானி மற்றும் ஆச்சார்யருக்குத் தகுந்த வரிசையைச் சேர்ந்த ஒரு திகம்பர சாதுவும் ஆவார். இவர் ஒரு சிறந்த சொற்பொழிவாளர் மற்றும் கவிஞரும் ஆவார்^[1]. வீரசேனர், தென்னகத்தில் ஜைன இலக்கிய மறுமலர்ச்சிக்கு காரணமாக இருந்தவர்களுள் தலையாயவரான குந்தகுந்தர் ஆச்சாரிய பரம்பரையைச் சேர்ந்தவர்^[2]. இவரது மாணவர் ஜினசேனர் ஆவார்.

வீரசேனர் ஒரு கணிதவியலாளர். ஒரு திண்ம அடித்துண்டின் கன அளவு காணும் முறையைக் கண்டுபிடித்தவர். இவர் ஆய்வுசெய்த கருத்துருக்கள்: ஒரு எண்ணை எத்தனை தடவை எண் 2 ஆல் வகுக்க முடியும் -2 அடிமான மடக்கைகள் (ardhaccheda); 3 அடிமான மடக்கைகள் (trakacheda), 4 அடிமான மடக்கைகள் (caturthacheda.)^[3]

ஒரு வட்டத்தின் சுற்றளவு C, விட்டம் d இரண்டுக்குமான தொடர்பைத் தரும் தோராயமான வாய்ப்பாட்டினை அளித்துள்ளார்:

C = 3d + (16d+16)/113

அதிகளவு விட்டமுடைய (d) வட்டங்களுக்கு இவ்வாய்ப்பாடு தரும் π  இன் தோராய மதிப்பு:

π ≈ 355/113 = 3.14159292... .

இம்மதிப்பு ஆரியபட்டியத்தில் ஆரியபட்டரால் தரப்பட்டுள்ள தோராய மதிப்பைவிடத் துல்லியமானது.^[4]