புள்ளிக் கழுதைப்புலி அல்லது சிரிக்கும் கழுதைப்புலி (ஆங்கிலப் பெயர்: spotted hyena, உயிரியல் பெயர்: Crocuta crocuta) என்பது ஒரு வகை கழுதைப்புலி ஆகும். குரோகுடா பேரினத்தின் ஒரே உறுப்பினர் இது மட்டுமே ஆகும். இது துணை சகார-ஆப்பிரிக்காவைத் தாயகமாகக் கொண்டது. இவற்றின் தற்போதைய எண்ணிக்கை 27,000 முதல் 47,000 வரை இருக்கும் என மதிப்பிடப்பட்டுள்ளது. இவை ஆசியாவில் தோன்றியதற்கான வாய்ப்புகள் உண்டு. பின் பிலெய்ஸ்டோசீன் வரை 10 இலட்சம் வருடங்களுக்கு இவை ஐரோப்பா முழுவதும் காணப்பட்டன. கழுதைப்புலி இனங்களிலேயே இதுவே மிகப்பெரியதாகும்.