பாஸ்கி

பாஸ்கி (Bosskey) என்பவர் இந்தியத் திரைப்பட நடிகர், வானொலி நிகழ்ச்சி தொகுப்பாளர், மட்டைப்பந்து வீரர், தொலைக்காட்சி நிகழ்ச்சி தொகுப்பாளர்,^[1] மேடை சிரிப்புரையாளர் ^[2], தமிழ்த் திரைப்படம் (கோலிவுட்) மற்றும் ஊடகத் துறையில் பணியாற்றும் திரைப்பட விமர்சகர் ஆவார். இவர் ஜெயா தொலைக்காட்சியில் ஹரி கிரி அசெம்பிளி (1000 நகைச்சுவை நேர்காணல்கள்) மற்றும் சிரி கிரி ஸ்டேஷன் ^[3] போன்ற தொலைக்காட்சி நிகழ்ச்சிகளைத் தொகுத்து வழங்கியுள்ளார். மேலும் நகைச்சுவை மற்றும் கதாபாத்திர வேடங்களில் 18 தமிழ்ப் படங்களில் நடித்துள்ளார். யூடியூப்பின் இந்தியா கிளிட்ஸ் தமிழ் சேனல் மற்றும் சன் டிவியில் சொல்லுங்க பாஸ் நிகழ்ச்சியையும் (1000 நிகழ்ச்சிகள்) பாஸ்கியுடன் காஷாயம் என்ற தமிழ் சினிமா விமர்சன நிகழ்ச்சியினையும் (300 திரைப்பட விமர்சனங்கள்) வழங்கினார். ரேடியோ மிர்ச்சி, பிக் எஃப்எம் மற்றும் சூரியன் எஃப்எம் ஆகியவற்றில் சுமார் 5000 வானொலி நிகழ்ச்சிகளை வழங்கியுள்ளார். ஆனந்த விகடன் பத்திரிகையில் 17000 நகைச்சுவை துணுக்குகளையும் எழுதியுள்ளார். ஆனந்த விகடனில் கிரி கிரி என்ற பகுதியில் எழுதியுள்ளார். விஜய் தொலைக்காட்சியில் இது எப்படி இருக்கு நிகழ்ச்சியில் நகைச்சுவை நடிகராகத் தொகுத்து வழங்கினார். கிஷ்கிந்தாவின் மந்திர அறை படத்தின் தொகுப்பாளராகவும் பணியாற்றியுள்ளார். ஐபிஎல் 2020இன் பாஸ்கியின் இன்டெப்த் மற்றும் ட்ரோல் விமர்சனம் என்ற தலைப்பில் ஒவ்வொரு போட்டியின் முடிவிலும் பிகைன்ட்வுட்ஸ் ஏர் எனும் யூடியூப் அலைவரிசையில் வழங்கினார். இந்த நிகழ்ச்சி தமிழ் மட்டைப்பந்து ரசிகர்களிடையே நல்ல வரவேற்பைப் பெற்றது.