நொதியேறாப் பழச்சாறு

நொதியேறாப் பழச்சாறு (Must) புதியதாக பறிக்கப்பட்ட திராட்சைகளிலிருந்து பெறப்படுவதாகும். அப்போதுதான் நசுக்கப்பட்டு பழச்சாறு (பொதுவாக திராட்சைச் சாறு) எடுக்கப்பட்ட இதில் தோலிகளும் விதைகளும் (கொட்டைகள்) தண்டுகளும் கூட இருக்கும். நொதியேறாச் சாற்றின் மொத்த எடையில் 7–23% வரை இவ்வாறான திடப்பொருட்கள் இருக்கும். திராட்சைக் கள் தயாரிப்பில் இதுவே முதல் செயல்பாடு ஆகும். இதில் குளுக்கோசு இருப்பு வழமையாக 10 முதல் 15% வரை இருக்குமாதலால் பல சமையல் முறைகளில் இது இனிப்பானாகவும் பயன்படுத்தப்படுகின்றது. நமக்குக் வணிகமுறையில் பிழிந்தெடுக்கப்பட்டு விற்பனை செய்யப்படும் திராட்சை சாறு வடிகட்டப்பட்டு பாச்சர்முறையில் பதப்படுத்தப்பட்டிருக்கும். ஆனால் கள் தயாரிப்பிற்கான மூலப்பொருளான இது திடப்பொருட்களுடன் அடர்த்தியாக இருக்கும்.