ஜோ அபேவிக்கிரம

இலங்கையின் இரத்தினபுரி மாவட்டத்தில் லெல்லுபிட்டி எனும் பின்தங்கிய கிராமமொன்றில் பிறந்தவர் அபேவிக்கிரம. இவருடன் கூடப் பிறந்தவர்கள் மூவர். திப்பித்திகல கலவன் பாடசாலை, இரத்தினபுரி சீவலி வித்தியாலயம் ஆகியவற்றில் கல்வி கற்றார்.

இவர் நடித்த முதல் திரைப்படம் தேவசுந்தரி, இருப்பினும் இத்திரைப்படத்திற்கு முன்பாக இவர் நடித்த மற்றுமொரு திரைப்படமான 'சரதம' 1957 இல் திரையிடப்பட்டது. இவர் அறிமுகமான முதல் திரைப்படம் இதுவாகும். இவர் திரைப்படத்துறையில் பல பாத்திரங்களில் நடித்துள்ளார். இவர் நடித்த பாத்திரங்கள் ஒன்றுக்கொன்று வித்தியாசமானவையாகும். இயற்கையான நடிப்பினையே இவர் விரும்பியிருந்தார். இவரின் பெரும்பாலான பாத்திரங்கள் இயற்கையோடு பின்னிப் பிணைந்தவை.

1959 இல் உலகப் புகழ்பெற்ற நாடக ஆசிரியர் சேக்ஸ்பியரின் 'ஒதேலோ' நாடகத்தை நடித்து மேடை நாடகத்துறையில் அறிமுகமான இவர் பல மேடை நாடகங்களில் நடித்துள்ளார். மேலும், சின்னத்திரையில் தொலைக்காட்சி நாடகங்கள் பலவற்றிலும் நடித்துள்ளதுடன், தொலைக்காட்சி நாடகத் தயாரிப்பாளராகவும் பணியாற்றியுள்ளார்.

இலங்கையில் திரைப்படத்துறையில் ஈடுபட்டுள்ளோருக்கு வழங்கப்படும் உயர்ந்த விருதாகக் கருதப்படுவது சரசவிய விருதாகும். ஜோ அபேவிக்கிரம 11 தடவைகள் இந்த விருதைப் பெற்றுள்ளார்.

• 1965 சரசவிய விருது (திரைப்படம் - கெடவரயோ)
• 1966 ஜனரஞ்ச மற்றும் சிறந்த நடிகர் விருது (திரைப்படம் - சாரவிட)
• 1981 சிறந்த நடிகர் விருது (திரைப்படம் - பெத்தேகம)
• 1983 சிறந்த நடிகர் விருது (திரைப்படம் - மலட்ட நொயன பம்பரு)
• 1986 சரசவிய உயர் விருது
• 1987 சிறந்த நடிகர் விருது (திரைப்படம் - மல்தெனியோ சிமியோன்)
• 1991 சிறந்த துணை நடிகர் (திரைப்படம் - பாலம யட்ட)
• 1992 சிறந்த நடிகர் விருது (திரைப்படம் - கொலு முகுதே குனாட்டுவ)
• 1993 சிறந்த நடிகர் விருது (திரைப்படம் - உமயாங்கனா)
• 1997 சிறந்த நடிகர் விருது (திரைப்படம் - வித்துசித்துவம்)
• 2002 சிறந்த நடிகர் விருது (திரைப்படம் - (புர ஹந்த கலுவர)

திரைப்படத்துறையினரை ஊக்குவிக்குமுகமாகவும், திரைப்படக் கலைஞர்களை கௌரவிக்குமுகமாகவும் வழங்கப்பட்ட இலங்கையின் அதியுயர் விருதாக சனாதிபதி விருதினை இவர் 7 தடவைகள் பெற்றுள்ளார்.

• 1980 சிறந்த துணை நடிகர் விருது (திரைப்படம் - வசந்தயே தவசக்)
• 1981 சிறந்த நடிகர் விருது (திரைப்படம் - சிறிபோ அய்யா)
• 1982 சிறந்த நடிகர் விருது (திரைப்படம் - பெத்தேகம)
• 1983 சிறந்த நடிகர் விருது (திரைப்படம் - மலட்ட நொயன பம்பரு)
• 1987 சிறந்த நடிகர் விருது (திரைப்படம் - பூஜா)
• 1996 சிறந்த நடிகர் விருது (திரைப்படம் - லொக்கு துவ)
• 1997 சிறந்த நடிகர் விருது (திரைப்படம் - விது சிதுவம்)

1999ல் 12வது சிங்கப்பூர் திரைப்பட சர்வதேச விருதினை இவர் பெற்றார். புரஹந்த கலுவர திரைப்படத்தில் நடித்தமைக்காக சிறந்த நடிகருக்காக வழங்கப்படும் சில்வர் ஸ்கிரீன் விருது இவருக்குக் கிடைத்தது.

ஜோ அபேவிக்கிரம தனது 84 ஆவது வயதில் செப்டம்பர் 21 2011 காலமானார். அவர் உடற்பயிற்சிகளில் ஈடுபட்டிருந்த போது விழுந்த நிலையில் களுபோவில மருத்துவமனைக்குக் கொண்டு செல்லும் நிலையிலேயே உயிரிழந்தார். இவர் இரண்டு பிள்ளைகளின் தந்தையாவார்.

இப் பட்டியலிலுள்ள பெயர்கள் சிங்கள மொழி உச்சரிப்புக்கேற்ப எழுதப்பட்டுள்ளது.

• Joe Abeywickrama's Biography in Sinhala Films Database
• Joe Abeywickrama's Biography in Sinhala பரணிடப்பட்டது 2008-12-23 at the வந்தவழி இயந்திரம்
• Joe Abeywickrama in Sinhala^{[தொடர்பிழந்த இணைப்பு]}
• Official Website - National Film Corporation of Sri Lanka பரணிடப்பட்டது 2007-10-11 at the வந்தவழி இயந்திரம்
• இலங்கை சிங்களத் திரைப்பட ரசிகர்களிடையே நீங்கா இடம்பிடித்த ஜோ அபேவிக்கிரம - புன்னியாமீன்