கே. சோபா

கடலோர கர்நாடகாவில் உள்ள புத்தூரைச் சேர்ந்தவர்,^[5] ஷோபா, ராஷ்ட்ரிய ஸ்வயம்சேவக் சங்கத்தின் முழுநேரப் பணியாளர்களில் ஒருவர். ராஷ்ட்ரிய ஸ்வயம்சேவக் சங்கத்துடன் சிறுவயதிலேயே இவர் இணைந்தார்.^[6] சோபா அரசியலில் நுழைய முடிவு செய்தபோது, ​​ஆர். எஸ். எஸ். இவருக்கு ஆரம்ப உந்துதலைக் கொடுத்தது.^[7]

சோபா மைசூரில் உள்ள திறந்த நிலைப் பல்கலைக்கழகத்தில் சமூகவியலில் முதுகலை பட்டமும் சமூகப் பணி முதுகலைப் பட்டத்தினை மங்களூர் பல்கலைக்கழகத்தின் சமூகப் பணி ரோஷ்னி நிலயா பள்ளியில் முடித்தார்.

2004-இல் சோபா சட்ட மேலவை உறுப்பினராகத் தேர்ந்தெடுக்கப்படுவதற்கு முன்பு பாரதிய ஜனதா கட்சியில் பல்வேறு பதவிகளில் பணியாற்றியுள்ளார். மே 2008இல் பெங்களூரு யசுவந்த்பூர் சட்டமன்றத் தொகுதியிலிருந்து சட்டமன்ற உறுப்பினராகத் தேர்ந்தெடுக்கப்பட்டார். இவர் பி. எஸ். எடியூரப்பா அரசாங்கத்தில் ஊரக வளர்ச்சி மற்றும் பஞ்சாயத்து ராஜ் அமைச்சராக நியமிக்கப்பட்டார்.

ஊரக வளர்ச்சி மற்றும் பஞ்சாயத்து ராஜ் அமைச்சராக நியமிக்கப்பட்ட இவர்,^[8] இவரின் செயல்பாடுகளுக்காகப் பாராட்டப்பட்டார்.^[9] மேலும் ஒரு நல்ல நிர்வாகியாக அறியப்பட்டார். இவர் அரசியல் நெருக்கடி காரணமாக 2009-இல் பதவி விலக நேரிட்டது. ஆனால் மீண்டும் 2010-இல் பதவியில் அமர்த்தப்பட்டார். இம்முறை இவர் எரிசக்தி துறை அமைச்சரானார். இவர் ஜெகதீஷ் ஷெட்டர் அமைச்சகத்தில் மின்துறை அமைச்சராக இருந்தார்.^[10] மேலும் உணவு மற்றும் குடிமைப் பொருள் வழங்கல் துறையின் கூடுதல் பொறுப்பையும் இவர் கவனித்தார்.

சோபா பாஜகவிலிருந்து விலகி 2012ஆம் ஆண்டு கர்நாடக முன்னாள் முதல்வர் பி. எஸ். எடியூரப்பாவால் உருவாக்கப்பட்ட கருநாடக சனதா கட்சியில் சேர்ந்தார்.^[11] சோபா கருநாடக சனதா கட்சியின் செயல் தலைவராக நியமிக்கப்பட்டார்.^[12][13] இவர் 2013 சட்டமன்றத் தேர்தலில் ராஜாஜி நகர் சட்டமன்றத் தொகுதியில் போட்டியிட்டு மூன்றாவது இடத்தைப் பெற்றார்.^[14] சனவரி 2014-இல், இவரது கட்சி பாஜகவுடன் இணைந்தது.

பின்னர் 2014ஆம் ஆண்டு நடைபெற்ற இந்தியப் பொதுத் தேர்தலில் உடுப்பி சிக்மகளூர் மக்களவைத் தொகுதியில் போட்டியிட்டு 1.81 லட்சம் வாக்குகள் வித்தியாசத்தில் வெற்றி பெற்றார். 2019ஆம் ஆண்டு நடைபெற்ற பொதுத் தேர்தலில் இவர் தொடர்ந்து இரண்டாவது முறையாக 7,18,916 வாக்குகளைப் பெற்று,^[15] உடுப்பி சிக்மகளூர் மக்களவைத் தொகுதி உறுப்பினர் ஆனார்.^[16]