Kim Xhong-un
Kim Xhong-un (koreançe: 김정은, Kim Jong-un, AFN: [ɡim dʑʌŋ ɯn]; lindur më 8 Janar 1984) është djali i tretë dhe me i vogël i ish-udhëheqësit të Koresë së Veriut, Kim Xhong-il, dhe bashkëshortes së tij, Ko Jang-hi; si dhe nipi i Kim Ir Senit. Prej fundit të vitit 2010, Xhong-un-i shihet si trashëgimtar i udhëheqjes së vendit dhe, mbas njoftimit të vdekjes së t'et, ai u quajt "Trashëgimtar i Madh" prej televizionit shtetëror të Koresë së Veriut.
Xhong-un-i është daexhang (gjeneral) në Ushtrinë Popullore Koreane. Thuhet të ketë studiuar shkenca kompjuterike privatisht në Korenë e Veriut. Ai ka dy diploma, një në vizitë prej Universitetit Kim Irsen dhe një tjetër nga Akademia Ushtarake Kim Ir Sen.
Jeta e hershme
Informatat e pakta mbi jetën e hershme të Kim Xhong-un vijnë nga të arratisurit nga Korea e Veriut dhe njerëzit që kanë pohuar se e njohin nga koha e qëndrimit të tij jashtë shtetit, si për shembull gjatë periudhës kur ndiqte shkollën në Zvicër. Disa nga informacionet kanë qenë kontradiktore, ndoshta duke e ngatërruar atë me vëllain e tij, Kim Jong-chul, i cili gjithashtu ka ndjekur shkollën në Zvicër në të njëjtën kohë. Autoritetet e Koresë së Veriut kanë deklaruar se data e lindjes së tij është 8 janar 1982, por zyrtarët e inteligjencës të Koresë së Jugut besojnë se data e vërtetë e lindjes është një vit më vonë. Sipas basketbollistit Dennis Rodman i cili e takoi Kimin në shtator 2013, datëlindja e tij është me 8 janar 1983.[1] Kim Jong-Un ishte i dyti i tre fëmijëve të Ko Yong-hui dhe diktatorit Kim Xhong-il; vëllai i tij më i madh Kim Xhong-çul lindi në vitin 1981, ndërsa motra e tij më e vogël, Kim Yo-jong, besohet të ketë lindur në vitin 1987.[2][3]
Sipas njoftimeve të botuara së pari në gazetat japoneze, ai shkoi në shkollë në Zvicër afër Bernit. Raportet e para pretenduan se nga viti 1993 deri në vitin1998 ai ndoqi shkollën ndërkombëtare private në anglisht në Gümligen nën emrin "Chol-pak" ose "Pak-chol".[4] Ai përshkruhet si i turpshëm, si nxënës i mirë i cili kalonte mirë me shokët e klasës dhe adhuronte basketbollin.[5]