Bard (an franch provensalBar) a l'é un comun dla Val d'Osta ëd 134 abitant. Ël pais as treuva a 47,5 chilòmeter d'Osta, an na gòrgia topa, a 400 méter an sël livel dël mar. A l'é ant un leu ëd passage për la comba ëd Champorcher.
Ël pais ëd Bard a resta anfeodà a Ugon ëd Bard, quand chiel a fa at ëd sotmission a Tomà I dël 1191. Peui Castel ëd Bard e pais a resto ciapà ant le question antra fratej ch'a-i ven-o dapress a la mòrt d'Ugon, e dël 1242 pais e castel a-j van ai Savòja. Con sòn la sgnorìa ëd Bard as treuva separà da cola ëd Champorcher, che a-i resta a la famija Bard.
Ël castel a ven angrandì dai Savòja, fin-a a esse demolì da Napoleon, ai temp dla Sconda anession a la Fransa. Dël 1830, na vira che Val d'Osta e Piemont a-j torno an man ai Savòja, a sarà arfàita la fortificassion, ant la forma ch'a së s-ciàira anco' al dì d'ancheuj.