କେଶବ ସ୍ୱାଇଁ

କେଶବ ସ୍ୱାଇଁ, ନିଜ କହୁଣିରେ, ଆଣ୍ଠୁରେ ତଥା ମୁଣ୍ଡରେ ପଇଡ ଭାଙ୍ଗି ଗୋଟିକ ପରେ ଗୋଟିଏ ବିଶ୍ୱ ରେକର୍ଡ଼ ପ୍ରତିଷ୍ଠା କରି ଚାଲିଥିବା ଜଣେ ନିଆରା କଳାକାର । ^[୧] କୌଣସି ପ୍ରଶିକ୍ଷଣ ଗ୍ରହଣ କରିନଥିବା, କେଶବ କେବଳ ଅନ୍ୟମାନଙ୍କୁ ଅନୁକରଣ କରି ବିଭିନ୍ନ ମାର୍ଶାଲ୍ ଆର୍ଟକୁ ଆୟତ୍ତ କରିପାରିଛନ୍ତି । ବର୍ତ୍ତମାନ, ସେ ମାର୍ଶାଲ୍ ଆର୍ଟ ଓ ନେଚୋରପ୍ୟାଥିକୁ ପାଥେୟ କରି, ନିଜ ଗୁଜୁରାଣ ମେଣ୍ଟାଉଛନ୍ତି ।

କେଶବ ସ୍ୱାଇଁ
ଜନ୍ମ	ବାହାରପୁର,ଧରାକୋଟ,ଗଞ୍ଜାମ, ଓଡ଼ିଶା
ଜାତୀୟତା	ଭାରତୀୟ
ପ୍ରସିଦ୍ଧି	କଳାକାର

ଅବିଭକ୍ତ ଗଞ୍ଜାମ ଜିଲାର ଧରାକୋଟ ବ୍ଲକ ଅନ୍ତର୍ଗତ ବାହାରପୁର ଗ୍ରାମର ଏକ ଗରିବ ପରିବାରରେ , କେଶବ ଜନ୍ମଗ୍ରହଣ କରିଥିଲେ । ୪ ଭଉଣୀ ଓ ୩ ଭାଇଙ୍କୁ ନେଇ ତାଙ୍କ ପରିବାରରେ ମୁଠାଏ ଖାଇବାକୁ ନଥିଲା । ଇଚ୍ଛା ଥିବା ସତ୍ତ୍ୱେ, ଅର୍ଥାଭାବ ଯୋଗୁ, କେଶବ ପାଠ ପଢିପାରି ନଥିଲେ । ଜୀବନରେ କିଛି କରିବାକୁ ନିଷ୍ପତି ନେଇ, ୧୬ ବର୍ଷ ବୟସରେ ସେ ଘର ଛାଡିଥିଲେ । ହାତରେ ୫ ଟଙ୍କା ଓ ଖଣ୍ଡିଏ ଗାମୁଛା ଧରି, ସେ ବ୍ରହ୍ମପୁର ଷ୍ଟେସନରୁ ରେଳଗାଡିରେ ଚଢିଗଲେ । ଅନିର୍ଦ୍ଦିଷ୍ଟ ଲକ୍ଷ୍ୟସ୍ଥଳ ଉଦ୍ଦେଶ୍ୟରେ ବାହାରି, କେଶବ ପ୍ରଥମେ ହୁବୁଳି ଓ ତାପରେ ଗୋଆରେ ପହଞ୍ଛିଥିଲେ । ଅଜଣା ସ୍ଥାନରେ, କ୍ଷୁଧା ନିବାରଣ ପାଇଁ ତାଙ୍କ ପାଖରେ କିଛି ସାଧନ ନଥିଲା । ଏହି ଅବସ୍ଥାରେ, ଗଛ ଚଢିବାରେ ଧୁରନ୍ଧର କେଶବ ନଡ଼ିଆ ଗଛ ଦେଖି ଚଢିଗଲେ ଓ ନଡ଼ିଆ ତୋଳିଆଣିଲେ । କିନ୍ତୁ ନଡ଼ିଆ ଛଡେଇବା ଉପାୟ ନପାଇ, ନିଜ କହୁଣିରେ ନଡ଼ିଆ ଭାଙ୍ଗିବାକୁ ଲାଗିଲେ । ଏହାଦ୍ୱାରା ତାଙ୍କ କ୍ଷୁଧା ନିବାରଣ ତ ହେଲା ତା ସହିତ ତାଙ୍କ ଭିତରେ ଏକ ଅଦ୍ଭୁତ ଆତ୍ମ ବିଶ୍ୱାସ ଜାଗ୍ରତ ହେଲା ଯେ ସେ କହୁଣିରେ ନଡ଼ିଆ ଭାଙ୍ଗିପାରନ୍ତି । ଏହି କୌଶଳକୁ ସେ ଅଭ୍ୟାସଦ୍ୱାରା ଆହୁରି ମାର୍ଜିତ କଲେ ଓ ଲୋକମାନଙ୍କ ଆଗରେ ନିଜ କଳା ପରିବେଷଣ କରିବାକୁ ଲାଗିଲେ । ଏହି କଳା ସେ ଗୋଆ, ବମ୍ବେ, ସୁରତ,ବ୍ରହ୍ମପୁରରେ ପରିବେଷଣ କରି, ବର୍ତ୍ତମାନ ଭୁବନେଶ୍ୱରକୁ ନିଜ କର୍ମଭୂମି ଭାବରେ ବାଛିନେଇଛନ୍ତି ।