Sant Alban de Montanha

Las fòrmas ancianas son Sancto Albano, en 1038, mandamento Sancti Albani, en 1112. Albanus èra un martir anglés delh sègle III ^[2],[3],[4]. La fòrma occitana es probablament Auban. En Ardecha, i a tres comunas delh nom de Sant Alban, un determinant èra necessari; l'altitud de Sant Alban justifica la mencion de Montanha.

Espezonne (nom francés, probablament Espesona) es un vialatge important situat alh nòrd de la comuna, a dos km de L'Esperon, sus un site defensiu (restrenhement de plana, en situacion dominanta).

Un acte citat dins l'« Histoire générale de la province de Languedoc », e tirat delh cartulari de Sant Guilhèm dau Desèrt, datat de 1043, indica que dos senhors delh Vivarés (Icterius de Solomachio et Pontius de Gaugacho) donan a l'abadiá de Sant Guilhèm dau Desèrt una glèisa delh vocable de Sant Alari : « ecclesia Sancti Hilarii quae dicitur Spidonia », situada a l'entorn de Pradèlas « in suburbio castri quod dicitur Pradellas ». La glèisa de L'Esperon es dedicada a Sant Alari, mas la latinizacion Spidonia sembla correspondre mai a Espesona qu'a L'Esperon. Lo nom sembla escur, tot coma Espesèlh (un rapòrt amb lo vèrbe specto, « gaitar, espiar, considerar » amb una lenicion aboriva en *spet- ?). En tot cas, Espesona es a costat d'un riu nommat en francés Espézonnette (e lo nom delh riu deriva probablament delh nom delh vialatge, pr'amor delh sufixe).

• Entre 1795 e 1800, annexèron Concolas a Sant Alban e la comuna venguèt Saint-Alban et Concoules (en francés). Puèi en 1829, Concolas passèt a L'Esperon ^[5].

• Abans la refòrma cantonala de 2014, aplicada en 2015, la comuna èra delh Canton de Sant Estève de Ludarés; es ara delh canton de Nauta Ardecha (Tuèis burèu centralizator).

• Comunas d'Ardecha