Poiartin

La prononciacion qu'ei [pujar'tiŋ]. Las fòrmas ancianas que son Sanctus Germanus de Agyrizi aus sègles XI-XII, Poyartin (mapas de 1647, 1714 e de 1733) ^[2].

Segon Dauzat e Rostaing, lo nom que vien de podium, « lòc haut, tuc de la cima mei o mensh arredondida » e d'un nom d'òmi, probablament germanic, Hartini ^[3].

Negre, citat per Bénédicte Boyrie-Fénié, qu'escriu la medisha causa, poi e nom Artin, qui contunha lo nom germanic d'òmi Hartinus ^[2].

Bénédicte Boyrie-Fénié que causeish lo producte de podiu- e lo cognomen Artinus, atestat tot ben que rare. Per justificar poi, que dona lo cas deu lòc Pouy le Haut, « Poi lo Haut » [Pouy solament sus las mapas), a 1,5 km au nòrd-oèst deu borg, qui, segon Dompnier de Sauviac a la fin deu sègle XIX, a « ua situacion excepcionau suu punt culminant... de l'encontrada » [qu'ei un tuc de 93 m en suspart deu planèr de 60-70 m]; que i an trobat vestigis d'epòca romana. Lo nom primitiu qu'ei lo de la prumèra atestacion. Qu'ei a l'origina, dab la preposicion de, deu patronime Dayris/Deyris [e probablament Deyries], noms deu departament de las Lanas, qui an lo sens de « sortit d'Agyrizi » (deu lòc qu'ei adara Poiartin) : *Agirisí > *Airís(i) > Airís. *Agirisí qu'ei un tèrme aquitanic qui's tròba enqüèra dens lo basco modèrne ageri « en vista, expausat, visible ». Segon J.B. Orpustan, lo basco medievau qu'utiliza sovent agerre (agirre dens los dialèctes iberics occidentaus) : radical verbau actuau deu nom verbau agertze, « paréisher »; *agerraitz (> agerritz > agir(r)itz), « ròc en vista », que seré a la basa d'agyrizi^[2]. Se comprenem com cau, agyrizi que seré pus especificament Poi lo Haut o un lòc situat a costat, com adara lo borg; mès, se Poiartin ei un nom qui vien après, lo nom germanic d'òmi Hartin- qu'ei ua solucion mei logica qu'un cognomen d'epòca romana; o alavetz que caleré imaginar ua concurréncia enter lo nom basco e lo nom romanic.

• Comunas de las Lanas

• Portau de Gasconha