Niòns

Lo nom de Niòns se pronóncia [ˈɲɔⁿ] dins lo parlar vivaroalpenc local (J. Gilliéron e E. Edmont, 1902, Atlas linguistique de la France, París: Champion, carta II; escrivon «n̮õ» dins la notacion fonetica de l'epòca).

• En occitan ancian se disiá Niòns o Niòms amb una assimilacion medievala de n-m vèrs n-n (çò que se mòstra indirèctament en latin medieval occitanizat, dins las formas atestaas Nionis o Niomis o Niomes; vej. Dictionnaire topographique du département de la Drôme, p. 248).
• Lo nom remonta al latin classic Noviómagus, que ven del cèlta Noviómagos «novèl champ, novèl mercat» (segon A. Dauzat e Ch. Rostaing, 1963 [1978], Dictionnaire étymologique des noms de lieux en France, p. 502).

Una varianta prononciada [ˈnjuⁿ] o [ˈɲuⁿ] es tanben atestaa mas sembla pas locala: s'escriu variablament «Nions» o «Niom» dins de publicacions en grafia classica, o ben «Nioun» en grafia mistralenca (dins Lo Tresaur dau Felibritge de Mistral), o encara «Gnoun» dins de publicacions anterioras a Mistral (per exemple dins JJ Castor, 1843, L'Interprète provençal, Ate: Imprimerie Louis Clauzel, p. 184).

Situat a las cofinhas dels Alps del Dalfinat e de las Baroniás a una quarentena de quilomètres, a l'èst de la val de Ròse (Pèiralata), Niòns es una pichona vila localizaa dins una comba, al ras del riu d'Éguer, afluent de Ròse.

• Comunas de Droma