Concas (Roergue)

Lo vilatge es situat al jonhent de Dordon e d'Ocha, que forma a aquel endrèch una mena de cauquilha (« Concha » en latin, « Conca » en occitan), que donèt lo nom al vilatge.

Al nòrd de Rodés, al fons d'una comba apareis lo vilatge medieval de Concas serrat a l'entorn de l'Abadiá de Santa Fe, a mièja penda de l'adrech. Los ostals dispausats en espalier viran las siás façadas principalas cap al miègjorn. L'esquist regna aicí en mèstre e porgís non solament la pèira de bastir mas tanben lo pavat de las carrièras e las lausas dels tets. Cedís la plaça a la pèira de talha e al gres ròsa o gris, mai rarament al granit, pels enquadraments de las pòrtas e de las fenèstras. Es l'associacion d'aquelas pèiras e de la sabla de Dordon, eissida de la desagregacion de las ròcas de meteissa origina, que dona al patrimòni bastit de Concas las siás tintas òcras dels rebats rosats en armonia perfiècha amb lo sieu environament.

• Comunas d'Avairon