Chaufaier

Autrecòps lo territòri de la comuna se sonava Aubassanha, nom derivat de l'adjectiu latin albus, significant blanc e del nom sanha. Lo senhor del luòc i bastiguèt un ostal fòrt, dependent del vibailatge del Champsaur. Al començament del S. XIV que la familha de las Herbeys ereta del mandament d'Aubassanha, e entreprenguèt de ne far una demora senhoriala.

Dins la segonda mitat del S. XIX, Louis-François dels Herbeys faguèt bastir un canal de derivacion de Severaisseta per permetre l'asagatge de las tèrras d'Aubassanha. Aquel besal, que lo traçat ne demòra vesedor de Sant Jacme fins al castèl, es uèi abandonat.

En 1887, lo masatge de Chaufaier, establit sus la rota reiala de Grenòble a Grassa (futura rota nacionala 85), es vengut lo mai important de la comuna. Lo capluòc i es alavetz establit, e la comuna ne pren lo nom.

Pendent la Segonda Guèrra Mondiala, Chaufaier, que gaireben la totalitat de la populacion èra en favor de la Resisténcia, porgiguèt dos grops de combat als FFI, un del AS (comandada per Jean Jourdan, mèstre d'escòla revocat per Vichèi), l'autre FTP comandat per J. Gras, el tanben regent. D'autre latz, lo vilatge aparèt tres familhas josievas que subrevisquèron.

Lo dimenge 20 d'agost del 1944, los grops de resisténcia ataquèron la colomna alemanda venenta de Grenòble per assistir la garnison de Gap. I aguèt un combat qu'i moriguèron dos maquisards (Mathieu e Gras, omonim del capitani FTP) e autres tres abitants de Chaufaier. La bòria dels Quatre Camins foguèt incendiada. Lo cònsol màger, Pierre Roux, èra demorat valentament al pòste dins un vilatge totalament desertat.

Lo vespre del 21 d'agost del 1944, l'avantgarda americana arribèt a Chaufaier e contunhèt sa rota cap a Grenòble, parallèlament a una autra colomna que passava per Lus-la-Croix-Haute^[3].

• Comunas dels Auts Aups