Verdscupen i skiskyting 2016

Verdscupen i skiskyting 2016 tok til 29. november 2015 og vart avslutta 20. mars 2016. Turneringa omfatta 25 individuelle tevlingar for begge kjønn. Renna fann stad i Östersund i Sverige, Hochfilzen i Austerrike, Pokljuka i Slovenia,Ruhpolding i Tyskland, Antholz i Italia, Canmore i Canada, Presque Isle i USA, Oslo i Noreg og Khanty-Mansijsk i Russland.

Dei mannlege utøvarane tevla i tre 20 km normalprogram, ni stk 10-kilometer sprint, åtte jaktstartar à 12,5 km og fem 15 km-lange fellesstartar. I tillegg vart det arrangert fem stafettar over 4 x 7,5 km. Martin Fourcade frå Frankrike triumferte for femte året i rad. Norske Johannes Thingnes Bø kneip andreplassen framom russaren Anton Sjipulin.

Dei kvinnelege utøvarane tevla i tre 15 km normalprogram, ni stk 7,5 km sprint-tevlingar, åtte jaktstartar à 10 km og fem fellesstartar à 12,5 kilometer. I tillegg vart det arrangert fem stafettar over 4 x 6 km. Gabriela Soukalová frå Tsjekkia vann verdscupturneringa for fyrste og einaste gong. På dei neste plassane kom franske Marie Dorin-Habert og italienske Dorothea Wierer.