Isolar-turneen 1976

Konsertane byrja utan introduksjon med ei framvising av surrealistfilmen til Luis Buñuel og Salvador Dalí, Un Chien Andalou frå 1928, som inkluderte kjende seksjonar av ei barberblad som skjer inn i augeeplet til ei kvinne.^[5] Bowie kom på scenen så snart filmen var over, medan publikum framleis var desorienterte. Dei visuelle elementa i konsertane nytta sider av fluorescerande kvitt lys mot ein svart bakgrunn, som skapte eit nakent skode på ein scene som stort sett var blotta for rekvisittar og andre visuelle distraksjonar.

Konserten i Public Auditorium i Cleveland i Ohio den 28. februar 1976 vart fanga på lydband av ein konsertgåar og gjeven ut som piratkopiplata «NeoExpressionism» på TSP (The Swinging Pig). Denne vart digitalt ommastra i 2007 og gjeven ut på ein dobbel-CD. Den einaste songen som ikkje vart framført på denne konserten var «Sister Midnight.»

Konserten i Nassau Veterans Memorial Coliseum i Uniondale i New York den 23. mars 1976 var spelt inn av RCA Records og delar av det vart sendt på The King Biscuit Radio Network. To songar frå opptaket vart sidan gjevne ut i 1991 på Rykodisc si utgåve av Station to Station. Heile Nassau-konserten kom ut på luksusutgåva av Station to Station i 2010, i tillegg til i plateboksen Who Can I Be Now? (1974–1976) i 2016. Han vart gjeven ut separat på LP, CD og digitalt i februar 2017 som Live Nassau Coliseum '76.

Bowie tok venen og musikaren Iggy Pop med seg på turneen. Etter ein konsert 21. mars 1976 vart Bowie og Pop arresterte i lag for å ha på seg marihuana i Rochester i New York, sjølv om tiltalane seinare vart henlagt.^[6]

Turneen har blitt skildra under ei rekkje ulike namn. Sjølv om han offisielt vart kalla Isolar-turneen, har han òg blitt kalla The Thin White Duke-turneen, Station to Station-turneen og White Light-turneen. I følgje biografen Nicholas Pegg var ordet «Isolar» eit anagram av «sailor», eit av favorittorda til Bowie. Isolar kom òg frå eit selskap Bowie lanserte for å ta seg av musikkpubliseringa etter at han drog frå MainMan Publishing. Bowie sjølv sa seinare: «Isola er italiensk for øy. Isolasjon pluss Solar er Isolar. Om eg hugsar det rett, eg var stein.»^[2]

Denne setlista er representativ for konserten 7. mai 1976 i London i Empire Pool. Han representerer ikkje alle konsertane på heile turneen.