Elvar i Serbia

Alle elvane i Serbia høyrer til nedslagsfelta til dei tre havområda Svartehavet, Adriahavet og Egearhavet.

Det største av desse er nedslagsfeltet til Svartehavet, som dekkjer eit område på 81 261 km² eller 92 % av området til Serbia. Heile dette området vert drenert av berre ei elv, Donau, som munnar ut i Svartehavet. Alle store elvar i Serbia, som Tisa, Sava, Velika Morava eller Drina høyrer til dette nedslagsfeltet.

Nedslagsfeltet i Serbia som drenerer ut i Adriahavet dekkjer 4500 km² eller 5 % av Serbia. Det består av vestlege halvdel av Kosovo og Metohija og vert hovudsakleg drenert av ei elv, Kvite Drin, som i Albania møter Svarte Drin og dannar elva Drin som munnar ut i Adriahavet. Mindre del av nedslagsfeltet vert drenert av Crni Kamen-Radika heilt sør i regionen Gora. Ho renn først inn i Makedonia og så ut i Svarte Drin og Drin.

Det minste nedslagsfeltet, på 2650 km² eller 3 % av Serbia, høyrer til Egearhavet ved grensa til Makedonia og Bulgaria. Tre elvar drenerer dette området, Lepenac, Pčinja og Dragovištica. Dei første to munnar ut i elva Vardar i Makedonia, og den tredje munnar ut i elva Struma i Bulgaria. Begge desse munnar ut i Egearhavet.

Desse tre nedslagsfelta møter kvarandre ved fjelltoppen Drmanska glava på Crnoljeva sentralt i Kosovo og Metohija, som er eit av dei støre vasskilja på Balkan, sidan det deler tre av fire nedslagsfelt på Balkan. Det fjerde høyrer til Det joniske havet.

Lengda i tabellen er gjeven for heile elva, ikkje berre den serbiske delen av ho. Den første tabellen inneheld elvar over 50 km, inkludert vassdrag som Store Morava. I desse tilfella er lengda gjeven som den totale lengda av vassdraget.