Cha cha cha av Käärijä

«Cha cha cha» er skriven av rapparen Käärijä (Jere Pöyhönen), saman med Johannes Naukkarinen, Aleksi Nurmi og Jukka Sorsa.^[1] Käärijä skildra låten som ein «hymne for å gløyme kvardagen».^[2] Songen har element av rap, elektropop og metalrock, og Käärijä har sagt at songen er inspirert av favorittbandet Rammstein.^[3]

«Cha cha cha» blei plukka ut som eit av sju bidrag til Uuden Musiikin Kilpailu 2023, den finske uttakinga til Eurovision Song Contest. I tevlinga opptredde Käärijä i oppblåsen, grøn bolero, bar mage og skinnbukser. Med på scena hadde han fire cha-cha-cha-dansarar i rosa dansedrakter.^[4]

I finalen 25. februar vann «Cha cha cha» ein solid siger hos både dei internasjonale jurygruppene og sjåarane. Songen fekk samla 539 poeng – 387 poeng føre andreplassen, og den største sigersmarginen i tevlinga si historie.^[5] Med sigeren blei «Cha cha cha» det finske bidraget til Eurovision Song Contest.^[6] I vekene før Eurovision Song Contest var «Cha cha cha» blant favorittane til å vinne tevlinga.

Finland var trekt til å delta i den fyrste semifinalen av Eurovision Song Contest i Liverpool Arena tysdag 9. mai 2023. Der vann «Cha cha cha» semifinalen og avanserte til finalen laurdag 13. mai. I finalen vann songen telefonavrøystinga klårt, men enda på andreplass samanlagt bak Loreen og songen «Tattoo» frå Sverige.^[7] Andreplassen er den nest beste plasseringa til Finland i Eurovision Song Contest, etter sigeren i 2006.